Búgin «AMANAT» partiiasynyń Qoǵamdyq saiasat institýty janynan «TALQYLAU» jańa dialog alańy óz jumysyn bastady. Parlament depýtattarynyń, sarapshylar men qoǵam belsendileriniń qatysýymen ótken alǵashqy talqylaý Memleket basshysynyń Joldaýyna jáne aralas sailaý júiesine kóshýge arnaldy. Talqylaý áleýmettik jelilerde tikelei efirde taratý arqyly interaktivti formatta ótti, dep habarlaidy "Ult aqparat" partiianyń baspasóz qyzmetine silteme jasap.
«AMANAT» partiiasy ashyq, kásibi jáne teń jaǵdaida – jariia dialogtyń jańa standartyn qalyptastyrady. Otyrystyń negizgi ýaqyty saiasi júieni transformatsiialaý jáne aralas sailaý júiesine kóshý týraly pikirtalastarǵa arnaldy. Bul rette, spikerlerge suraqtardy zaldaǵy sarapshylar men qatysýshylar ǵana emes, sonymen qatar onlain-kórermenderdiń de qoiýyna múmkindigi boldy. Jalpy, 700-den astam pikir men suraqtar kelip tústi.
«TALQYLAU»-dyń alǵashqy otyrysyn ashqan «AMANAT» partiiasynyń Atqarýshy hatshysy Ashat Oralov Prezident jariialaǵan reformalar Qazaqstannyń memlekettik qurylysy tarihynyń jańa kezeńine bastaitynyn atap ótti.
«Sailaý týraly zańnamaǵa ózgerister engiziledi. Bul eldegi demokratiialyq ózgeristerdiń katalizatory men negizine ainalatyny sózsiz. Saiasi partiialardy tirkeý resimderin jeńildetý jańa saiasi qozǵalystardyń qurylýyna serpin beredi jáne jumys istep turǵan saiasi birlestikterdiń óz qyzmetin jandandyrýyna alyp keledi. Bul baǵytta «AMANAT» partiiasy belsendi jumys isteýde. Sezden beri bir aiǵa da jetpeitin ýaqyt ótti. Soǵan qaramastan onyń barysynda aitylǵan mindetter men bastamalar búginde iske asyrylyp jatyr jáne «TALQYLAU» - sol bastamalardyń biri», - dep atap ótti partiianyń Atqarýshy hatshysy.
Óz kezeginde, «AMANAT» partiiasy depýtattyq fraktsiiasynyń múshesi Saiasat Nurbektalqylaý alǵash ret tikelei efirde ótip jatqanyn alǵa tartyp, «Biz búgin qurylymdanbaǵan, tsenzýradan ótpegen ashyq dialog dástúrin bastaimyz dep úmittenemiz. Bul Prezident joldaýy aiasynda óte mańyzdy, óitkeni «Jańa Qazaqstan» jumysyn jańa qaǵidattar men jańa jumys formattarynan bastaý kerek», - dedi.
«Qazaqstannyń Azamattyq Aliansy» ZTB prezidenti Baný Nurǵazieva myqty qoǵamsyz myqty memleket qurý múmkin emes degen pikir bildirdi.
«Biz jańa reformalarǵa daiynbyz. Jurtshylyq kóp nárse ózgeredi degen úmitpen Joldaýdy yqylaspen qabyldady. Azamattyq qoǵam ókilderimen birlesip zańnamalyq ózgeristerge qatysty kóptegen jumys atqarylady dep kútemiz», - dedi ol.
Parlament Májilisiniń depýtaty Berik Ábdiǵaliulynyń aitýynsha, qazir elimizdi jańa deńgeige kóterýge úlken múmkinshilik bar. Ol úshin Jańa Qazaqstanda ózgeristi árkim ózinen bastaýy kerek.
«30 jylda jetken jetistikterimiz bar. Biraq kemshilikterimiz de az emes. Jańa Qazaqstanda partiiadan bastap, árbir azamatqa deiin, aýyl ákiminen Prezidenttiń jumysyna deiingi jiberilgen kemshilikterdi anyqtap, tipti, sonyń tizimin de jasasaq. Biýdjetti qurýda bizde kóptegen gigantonamiia boldy. Qanshama milliardtaǵan qarajat basqa jaqqa jumsalyp, al myna jaqta halyq úisiz-kúisiz júrdi. Onyń barlyǵy kemshilik pe? Árine, kemshilik. Sondyqtan Prezidenttiń aitqany, birinshi kezekte basymdyq ózgerýi kerek. Ol úshin halyqtyń jaǵdaiyna qaraý qajet. Barlyǵynyń ólshem – adam. Mine, qazirgi bizdegi naǵyz qaǵida osy. Birtindep soǵan kele jatyrymyz»,- dedi depýtat.
«Halyq únine qulaq asatyn memleket» týraly aitqanda, biz árqashan «qulaq asatyn memleket» jaǵdaiynda «aitatyn» qoǵam qajet ekenin túsinýimiz kerek. Eger ashyq «aitatyn» qoǵam bolmasa, onda olar kimniń únine qulaq asýy kerek? Endi biz protsesti jyldamdatý kerek. Óitkeni Joldaýda ideialar ǵana aityldy, al olardy qalai júzege asyratynymyzdy biz birge oilanýymyz kerek. «AMANAT» partiiasy óziniń alǵashqy ózgeristerin ashyq alańnan bastaǵany jáne bizdi shaqyrǵany quptarlyq», - dedi qoǵam qairatkeri, «Serpin» Ulttyq bilim jáne innovatsiialar palatasynyń prezidenti Murat Ábenov.
Sondai-aq, QR Prezidenti janyndaǵy QSZI direktory Erkin Tuqymov, Eýropalyq quqyq jáne adam quqyqtary institýtynyń direktory Marat Báshimov, Qazaqstandyq qoǵamdyq damý institýtynyń basqarma tóraǵasy Qazbek Maigeldinov, QR BǴM Ǵylym komitetiniń Memleket tarihy institýty direktorynyń orynbasary Búrkitbai Aiaǵan, Parlament Májilisiniń depýtaty Tilektes Adambekov jáne basqalar óz pikirlerimen bólisti.
Kelesi «TALQYLAU» otyrysy podkast jazbasy, debattar, pikirtalastar siiaqty túrli formatta ótedi. Ári qarai taqyryptar Qoǵamdyq saiasat institýtynyń Telegram-arnasynda daýys berý qorytyndysy boiynsha anyqtalatyn bolady.
Esterińizge sala keteiik, «TALQYLAU» pikirtalas alańyn qurý bastamasy 1 naýryzda ótken kezekten tys Sezde partiiany transformatsiialaý baǵdarlamasynyń bir tarmaǵy retinde jariialanǵan edi. Alańda azamattardy tolǵandyratyn ózekti máselelerdi sheshetin usynystar ázirleý úshin sarapshylar, depýtattar, memlekettik organdar men ÚEU ókilderi turaqty túrde kezdesedi. Sonymen qatar, pikirtalas «Aiqyn» jáne «Liter» gazetteriniń arnaiy aidarlarynda jariialanatyn bolady.
