«AMANAT» partiiasy memlekettik rámizderdiń 30 jyldyǵyna orai ashyq aspan astynda kontsert ótkizdi

Elordadaǵy EKSPO aýmaǵynda «AMANAT» partiiasynyń uiymdastyrýymen QR Memlekettik rámizderiniń 30 jyldyǵyna arnalǵan «Meniń Elim» atty merekelik kontsert ótti. Oǵan 20 myńnan astam kórermen qatysty.  

Elordalyqtar men qala qonaqtarynyń aldynda qazaq estradasynyń tanymal juldyzdarymen qatar jas ánshiler de óner kórsetti. 

Olardyń qatarynda - Roza Rymbaeva, Ulyqpan Joldasov, «Jigitter» toby, Aiqyn, Raim, Qýandyq Raqym, AYREE, Argonia, Mansur jáne Qobylandy, «Alashuly» toby, Dana Kentai, Farida Joldasova, Zarina Omarova, Prince, Sadraddin, 2RAR, AKHA bar.

Ónerpazdardyń úzilisi kezde «AMANAT» respýblikalyq partiialyq shtabynyń músheleri qazaqstandyqtardy merekemen quttyqtap, osy jeksenbide ótetin Konstitýtsiiaǵa ózgerister men tolyqtyrýlar engizý jónindegi jalpyulttyq referendýmǵa qatysýǵa shaqyrdy.

Májilis depýtaty Saiasat Nurbek atap ótkendei, elimiz damýdyń jańa kezeńine aiaq basty. 

«Bárimiz birge, búkil halyq bolyp Memleket basshysy jariialaǵan saiasi reformalar baǵyty tóńireginde toptasaiyq», - dedi halyq qalaýlysy.

Óz kezeginde belgili telejúrgizýshi Maqsat Tolyqbai konstitýtsiialyq reforma «Jańa Qazaqstan» qurý jolyndaǵy mańyzdy qadam ekenin atap ótti.

«Qarańyzdarshy, kók týymyzdyń jelbiregeni adamdy qalai tebirentedi, rýh beredi! Barlyǵymyz osy týdy biik ustaiyq! Qazir elimiz úlken ózgerister aldynda tur», - dedi Maqsat Tolyqbai. 

Belgili qazaqstandyq sportshy Abzal Ájiǵaliev te jinalǵandar aldynda sóz sóiledi. 

«Men ár azamattyń quqyqtary men bostandyqtary bárinen joǵary turatyn ádiletti Qazaqstanda ómir súrgim keledi», - dedi Abzal Ájiǵaliev. 

Eske sala keteiik, Táýelsiz Qazaqstannyń memlekettik rámizderi 1992 jyldyń 4 maýsymynda bekitildi.