Joǵalǵan alpinist Murat Ótepbaevtyń jubaiy Shaharizada Shahbýtova qutqarýshylar tobyna alǵys bildirip, alpinisterdiń aman oralýyna úmitti ekenin bildirdi, dep habarlaidy QazAqparat.
«Aýa-raiynyń qolaisyzdyǵyna qaramastan, izdestirý jumystary tolyqtai júrgizildi. Ózimniń jáne otbasymnyń atynan eki eldiń memlekettik uiymdaryna alǵysymdy bildirgim keledi. Kómek kórsetken adamdardyń barlyǵyna rahmet aitamyn. Ushqyshtarǵa, alpinisterge, konsýlǵa, ásirese qutqarýshylar tobyna alǵysym sheksiz. Jigitter kúndiz-túni jumys istedi. Uiyqtamady. Olar qoldan kelgenniń bárin jasady. Bizdiń jigitter aman-esen oralady dep senemiz, úmitimizdi úzbeimiz», - dedi Murat Ótepbaevtyń áieli búgin arnaiy ótkizilgen baspasóz máslihatynda.
Joǵalyp ketken alpinisterdi izdestirý operatsiiasy týraly qutqarý tobynyń múshesi, QR Qarýly Kúshteriniń aǵa leitenanty Vasilii Pivtsov aityp berdi.
«18 tamyz kúni saǵat 23:00-de komandalyq top jinaldy. Biz munda Armiia ortalyq sport klýbynan keldik. 19 tamyzda tańerteńgi saǵat 04:00-de Buryndai áýejaiyna jettik. Ol jerden saǵat 13:00-de ushyp shyqtyq. Sodan keiin Han Táńiri alpinistik lageri aýmaǵyna keldik. Kelesi kúni, 20 tamyzda, tańerteńgi saǵat 9.00-de Karkara - Ońtústik Irymchek baǵyty boiynsha QR Tótenshe jaǵdailar komitetiniń tikushaǵymen izdedik. Qaiǵyly oqiǵa bolǵan jerdiń ainalasyndaǵy reis, tragediianyń boljanǵan jerinen 8 ret ainalyp óttik. Tiri adamdar baiqalmady. Teplovizordy qoldandyq, biraq nátije bolmady. 21 tamyzda «Jeńis» shyńy aýmaǵynda qolaisyz aýa raiy boldy, ushýǵa ruqsat berilmedi. Kún raiynyń jaqsarýyn kúttik. 22 tamyzda da reis jasaldy. Jalpy, «Jeńis» shyńyn 14 ret ainala ushyp óttik. Nátije joq. Qazirgi ýaqytta kóshkin qaýpi joǵary, bul jaiaý izdeý jumysyna qaýipti. Búgin, 23 tamyzda izdeý jumystaryn júrgizgen komanda Almatyǵa keldi», - dedi Vasilii Pivtsov.
Óz kezeginde, QR Qarýly Kúshteriniń kapitany, ataqty alpinist Maqsut Jumaeva dabyl qaǵylǵan kúni qutqarý tobynyń basqa múshesi, QR QK-niń maiory Amanjol Rahmetovpen birge áskeri oiyndardan Almatyǵa oralǵanyn aitty.
«Maior Rahmetov ekeýmiz armiia oiyndarynan tańǵy saǵat 3-te keldik. Birge 5-6 myń metrge shyqtyq. Negizinde bizde izdestirý-qutqarý jumystaryn júrgizý úshin jetkilikti akklimatizatsiia boldy», - dedi Maqsut Jumaev.
Al Alpinizm jáne sporttyq quzǵa órmeleý federatsiiasynyń bas hatshysy Qazbek Valiev, «Jeńis» shyńyndaǵy reister sanyn, aýaraiy men órmeleý jaǵdailaryn, ushýdy uiymdastyrý men basqarýdy baqylaǵan.
«Joǵalǵan alpinister, tájiribe men fizikalyq turǵydan alǵanda, óte myqty sportshylar boldy. Biyl taýǵa qar qalyń tústi. Qiyn boldy. 13 tamyzda aýaraiy nasharlap ketti.13-17 tamyz aralyǵynda kúni boiy qatty qar jaýdy. Eń joǵary núktedegi top qolaisyz jaǵdaiǵa tap boldy. Jigittermen bailanys 18 tamyz kúni tańǵy saǵat 8-9-dan bastap úzildi», - dep atap ótti Qazbek Valiev.
Buǵanǵa deiin, Qyrǵyzstannyń Tian-Shan taýlarynda joǵalyp ketken qazaqstandyq alpinisterdi izdestirý jumystary toqtatylǵany týraly QR Qorǵanys ministrligi aqparat jáne kommýnikatsiialar departamentiniń basshysy Daniiar Aijanov aitqan bolatyn.
