Aljir prezidenti Ábdelaziz Býteflika besinshi ret prezident sailaýyna túspeitinin málimdedi. Ol 18 sáýirge josparlanǵan Prezident sailaýyn keiinge shegerdi. 82 jastaǵy Býteflikanyń hatyn 11 naýryzda aljirlik APS aqparat agenttigi jariialady.
Býteflika jyl sońyna deiin elde referendým arqyly jańa konstitýtsiia qabyldanatynyn, sailaý odan keiin ótetinin málimdedi.
APS aqparat agenttiginiń habarlaýynsha, el premer-ministri Ahmed Ýiahiia bastaǵan úkimet otstavkaǵa ketken. Onyń ornyna osyǵan deiin ishki ister ministri bolǵan Nýreddin Bedýi taǵaiyndaldy.
10 aqpanda Aljir prezidenti Ábdelaziz Býteflika sáýirde ótetin sailaýǵa qatysatynyn jariialaǵan. Onyń jazbasha málimdemesin memlekettik telearnalardyń biri taratqan edi. Osydan keiin elde jastar jappai narazylyqqa shyǵyp, Býteflikanyń bilikten ketýin talap etip jatyr. 2 naýryzda myńdaǵan adamnyń narazylyǵyn politsiia kúshpen basýǵa tyrysqan. Politsiiamen qaqtyǵysta 180-ge jýyq adam zardap shekken.
Býteflika buǵan deiin tórt ret sailaýǵa túsip, jeńiske jetken. 2013 jyly insýlt alyp, sodan beri jurt aldyna shyqpady. Málimdemelerin eldegi telearnadaǵy telejúrgizýshiler nemese mańaiyndaǵy kómekshileri oqyp júr. Halyqaralyq aqparat agenttikteri Býteflikanyń qazir Shveitsariiada emdelip jatqanyn habarlaǵan. Ol 11 naýryzda Shveitsariiadan elge oralǵan. Álemdik aqparat quraldarynyń jazýynsha, alty jyl buryn insýlt alǵan Býteflikanyń júrip-turýy qiyn.
1991 jyly Aljirde islamistik toptar men bilik arasynda azamattyq soǵys bastaldy. Býteflika bilikke eldegi azamattyq soǵys kezinde - 1999 jyly keldi. Ol Aljirdegi azamattyq soǵysty toqtatyp, elde beibitshilik ornatty. Qazir narazylyqqa shyqqandardyń arasynda "prezidentke qarsy emespiz, ol Aljir úshin kóp is tyndyrdy. Biraq qazir prezident bolýǵa densaýlyǵy kelmeidi" deitinder de bar.
