Nazarbaev ortalyǵynda «Altyn tobylǵy» respýblikalyq ádebi baiqaýy qorytyndylandy. Oǵan túrli janrda qalam terbep júrgen 18 ben 35 jas aralyǵyndaǵy qalamgerler qatysty.
Tuńǵysh Prezidenti – Elbasynyń Qory jas ádebietshilerdiń eńbegine osymen tórtinshi ret qoldaý kórsetti. Jyldan jylǵa baiqaýǵa degen qyzyǵýshylyq artyp keledi. Biylǵy báigege eldiń túkpir-túkpirinen 108 shyǵarma jiberildi.
Jeńimpazdar «Jyldyń úzdik prozasy», «Jyldyń úzdik poeziiasy», «Jyldyń balalarǵa arnalǵan úzdik shyǵarmasy», «Jyldyń úzdik dramatýrgiiasy» dástúrli atalymdar boiynsha belgilendi. Ár nominatsiia boiynsha syiaqy qory 1 million teńgeni quraidy. Sonymen qatar baiqaý Astananyń mereitoiyna arnalǵan «Astananyń 20 jyldyǵy» taqyrybyna arnalǵan úzdik ádebi týyndy» arnaiy atalymmen tolyqty. Onyń júlde qory 1,5 million teńge.
Marapattaý rásimine QR Parlamentiniń depýtattary, belgili qoǵamdyq, mádeniet, óner qairatkerleri, sondai-aq oqytýshylar men joǵary oqý oryndarynyń «jýrnalistika» fakýltetteriniń stýdentteri qatysty.
Baiqaýdyń mańyzdylyǵy men qazaq ádebietin damytýǵa qosatyn úlesine toqtalǵan Tuńǵysh Prezident Qorynyń atqarýshy direktory Qanat Jumabaev: «Jyl saiyn «Altyn tobylǵy» baiqaýy bizge qazaqstandyq jańa aqyndar men jazýshylardy tanytady. Bul óz kezeginde jastar men qoǵam arasynda qazirgi zamanǵy ádebietti oqýǵa yntalandyrýǵa, jańa býyn avtorlarynyń jarqyn ókilderin anyqtaýǵa yqpal etedi. Biz basty qundylyq dep osyny sanaimyz», - dedi.
Usynylǵan jumystar – adamdar arasyndaǵy qarym-qatynas, olardyń is-áreketteri, ulttyq bolmys pen el damýy týraly syr shertetin shynaiy nemese oidan shyǵarylǵan oqiǵalar.
«Baiqaý atalymdary belgili bir dárejede Elbasynyń «Uly dalanyń jeti qyry» maqalasynda aitylǵan halqymyzdyń rýhani qundylyqtaryn aishyqtaidy. Sol sebepti ultyq mádenietti, tarihty jáne el jetistikterine arnalǵan shyǵarmashylyq jumystardy biriktirip, jańa atalymdy qosý múmkindigi qarastyrylýda», - dedi Qanat Jumabaev.
«Jyldyń úzdik prozasy» atalymynda «Adasqandar» shyǵarmasymen Aizat Raqysheva úzdik shyqty. «Jyldyń úzdik poeziiasy» atalymy boiynsha Qaisar Qaýymbek («Kúńirenbe, molalar») jáne Aibol Islamǵaliev («Jalǵyzdyq kartinasy») qatar jeńimpaz atandy. «Jyldyń balalarǵa arnalǵan úzdik shyǵarmasy» atalymynda Alina Gatina jeńimpaz boldy.
«Astananyń 20 jyldyǵy» taqyrybyna arnalǵan úzdik ádebi týyndy» atalymynyń iegeri bolyp Talap Sherhan («Astana boiaýlary») tanyldy.
Biylǵy jyly «Jyldyń úzdik dramatýrgiiasy» atalymy boiynsha usynylǵan jumystardyń qoiylǵan talaptarǵa sai kelmeýine bailanysty, jeńimpaz anyqtalǵan joq. Sondai-aq «Jyldyń úzdik prozasy» atalymy boiynsha Tursynbek Basharovqa («Chirime») jáne «Jyldyń balalarǵa arnalǵan úzdik shyǵarmasy» atalymynda Aqan Marǵulanǵa («Jetiqaraqshy») kótermeleý syiaqysy retinde 500 myń teńgeden berildi.
