Qazaqstan Respýblikasy Tuńǵysh Prezidenti – Elbasynyń Qory 2019 jylǵy 1 shildeden bastap dástúrli «Altyn Tobylǵy» ádebi baiqaýyna ótinimder qabyldaýdy bastaidy.
Syiaqynyń jalpy qory – 5,5 million teńge.
Osymen besinshi ret ótkizilgeli turǵan baiqaý Jastar jylyna arnalady. Shyǵarmalar «Úzdik proza», «Úzdik poeziia», «Úzdik dramatýrgiia», «Úzdik balalarǵa arnalǵan shyǵarma» nominatsiialary boiynsha qabyldanady. Ár jeńimpazǵa 1 million teńge kóleminde syiaqy taǵaiyndalady.
Jastar jylyna arnalǵan arnaiy nominatsiia «Uly dalanyń jasampaz urpaǵy» taqyrybynda jazylǵan «Eń úzdik shyǵarma» dep atalady. Syiaqy kólemi 1,5 million teńgeni quraidy.
Baiqaýǵa elimizdiń 18-35 jas aralyǵyndaǵy jas daryndar qatysa alady jáne budan buryn esh jerde jariialanbaǵan týyndylar at2019@fpp.kz siltemesi boiynsha qabyldanady.
Shyǵarmalardy elimizdiń tanymal mádeniet qairatkerleri, aqyn-jazýshylar men jýrnalisterden quralǵan Qazylar alqasy saraptaidy.
Baiqaýǵa usynylǵan jumystar janrǵa sáikestik, oilaý derbestigi, avtorlyq ustanym, baiandaý rettiligi men maǵynalylyǵy, ideia ereksheligi, ádebi-kórkem qundylyǵy, kórkemdik qiial men shyǵarmashylyq kózqaras, estetikalyq áser tereńdigi siiaqty ólshemder boiynsha baǵalanady. Baiqaýǵa usynylǵan týyndylardy baǵalaý ádildigi barynsha jetildirilgen. Shyǵarma laqap atpen qabyldanyp, saraptaý kezinde qazylar alqasy shyǵarma avtorlarynyń esimderin aldyn ala bilmeidi.
Ótinimder 2019 jylǵy 1 shilde men 1 qarasha aralyǵynda qabyldanady. Jeńimpazdar esimi (syilyq laýreattary) 2019 j. jeltoqsan aiynyń alǵashqy onkúndiginde jariialanady. Tolyq aqparatpen www.fpp.kz saitynan tanysýǵa bolady.
Qazaqstan Respýblikasy Tuńǵysh Prezidenti – Elbasynyń Qory «Altyn Tobylǵy» ádebi baiqaýyn talantty jas avtorlardy anyqtaý jáne qoldaý maqsatymen 2015 jyly taǵaiyndady. Baiqaý áriptesi – Memlekettik tildi damytý qory.
