Ulttyq kinony qoldaý memlekettik ortalyǵy Altyn Orda tarihyna arnalǵan iri kinojobanyń tujyrymdamasyn ázirleýge kiristi.
Osy maqsatta kino ortalyǵynyń janynan jumys toby qurylǵan, ol el basshylyǵyna bolashaq kinojobanyń negizgi kórinisin, modeli men arhitektýrasy boiynsha usynys beretin bolady, dep habarlaidy QazAqparat.
Ulttyq kinony qoldaý memlekettik ortalyǵynyń baspasóz qyzmetiniń aqparatyna qaraǵanda, kinojobaǵa daiyndyqtyń birinshi kezeńinde kásibi tarihshylar men tájiribeli kinodramatýrg, etnograftar men ádebiettanýshylardan aqparat jinalady. Sonymen qatar, úlken halyqaralyq tarihi kinojobalardy jasaý boiynsha tabysty tájiribesi bar Gollivýd, Eýropa, Resei jáne Aziianyń úzdik óndiristik kompaniialary arasynan jahandyq seriktester men investorlardy izdeý júrgizilýde.
«Biz jumysty bastap kettik. Búgin tańerteń eki úzdik gollivýdtyq kompaniiamen videobailanys arqyly konferentsiia ótkizdik. Jaqyn arada aziialyq áriptesterimizben kezdespekshimiz. Bul jerde óndiristiń qarjylyq modelin pysyqtaýǵa basa nazar aýdarǵan jón. Keiin bizde ribeit tetigi qosylýy múmkin, iaǵni, Qazaqstan aýmaǵynda jumsalǵan qarajattyń bir bóligin sheteldik kompaniialarǵa óteý (sandar 30 %-ǵa deiin ózgeredi). Basqa jaǵdaida qalalyq jáne óńirlik Kinokomissiialar tarapynan barynsha qoldaý kórsetiletin bolady. Olardyń quzyretine bilik organdarymen ózara is-qimyl jasaý, ákimshilik resýrstarǵa qol jetkizý, túsirý jabdyqtarymen jáne kólikpen qamtamasyz etý, turatyn oryndy daiyndaý, akterlerdi, lokatsiialardy, derektemelerdi irikteý, jalpy, yńǵaily kinoóndiriske kómektesetin barlyq jaǵdaidy jasaý kiredi», deidi «UKQMO» KEAQ Basqarma tóraǵasy Esetjan Qosybaev.
Onyń sózine qaraǵanda, buǵan deiingi tarihi blokbaster túsirý tóńireginde bolǵan qatelikterdi qaitalamai, jobany jan-jaqty pysyqtaýǵa úlken jaýapkershilik júkteledi. «Birinshi kezekte ishki resýrstardyń ólshemi alynady – qazaqstandyq kinematografisterdiń qaisysy ádebi kontentti qalyptastyrýǵa daiyn. Túsiriletin kinonyń tarihi kezeńi is júzinde aiqyn bolǵandyqtan, biz sinopsis pen odan keiingi stsenariidi barynsha shynaiy ári tereń ádebi-tarihi taldaý negizinde jazýǵa kirisýimiz kerek. Bul protsess jedel, biraq sonymen birge óte muqiiat júrgiziledi dep aita alamyn. Osy mańyzdy jobamen jumys isteýde Ulttyq kinony qoldaý memlekettik ortalyǵy tarihi, mádeni, tárbielik jáne eń bastysy kásibi ádisnamany ázirleý jónindegi basty úilestirýshi bolýy tiis», - deidi E. Qosýbaev.
Onyń aitýynsha, bundai kartina erekshe mádeniettanymdyq aspektilerge toly. Sondyqtan, Kino ortalyǵy halyqty jobanyń jumys barysy men odan ári iske asyrý jóninde qabyldanǵan sheshimder týraly habardar etetin bolady.
Aita keterligi, Prezident Qasym-Jomart Toqaev óziniń úndeýinde kinematografisterge tarihi taqyryptaǵy filmderdi shyǵarý qajettigin aitqan bolatyn.
«Búginde álemdik kinoindýstriiada tarih taqyrybyndaǵy stsenariilerge suranys joǵary. Osy oraida bizdiń de shejiremizde aýqymdy filmderge arqaý bolatyn mańyzdy belester men oqiǵalar barshylyq. Mysaly, álemdegi eń qýatty imperiialardyń biri bolǵan Altyn orda tarihy daiyn turǵan joq pa?! Bul máselege bolashaqta kino salasynyń mamandary basa nazar aýdarǵany jón», - dep atap ótken edi Prezident.
