«Altyn belgi» tósbelgisi mekteptiń bilim deńgeiine esh áser etpeidi. Bul týraly QR bilim jáne ǵylym vitse-ministri Sholpan Karinova málim etti, dep habarlaidy QazAqparat.
Búgin QR Bilim jáne ǵylym ministrliginde «Altyn belgi» tósbelgisine úmitker bolý jáne emtihan tapsyrý taqyrybyna arnalǵan tikelei efir ótti.
Efir barysynda «Altyn belgi» mektep reitingisine áser ete me? Sondai-aq, «Eger «Altyn belgige» úmitker oqýshy tómen baǵa alsa, onda bilim bergen muǵalimniń sanaty tómendetiledi» degen áńgime tarap jatyr. Bul ras pa?» - degen saýal qoiyldy.
«Saýalda aitylǵan dúnie shyndyqqa janaspaidy. Ondai tártip, ereje joq. «Altyn belgi» mektep reitingisine áser etpeidi. Atalǵan tósbelgige úmitker bolý jáne ielený tek qana oqýshynyń bilim kórsetkishine bailanysty. Oqýshy úmitti aqtamaǵan jaǵdaida muǵalimge eshqandai talap, mindet qoiylmaidy. Ministrlikte ondai qujat joq», - dep jaýap berdi Sholpan Karinova.
Vitse-ministrdiń aitýynsha, muǵalimderge sanat berýdiń óz talaby men mindeti bar.
«Árine, muǵalimniń sanaty ósken saiyn, onyń bilim berý protsesin uiymdastyrýyna talap ta arta túsedi. Attestattaý kezinde muǵalimniń jeke jetistikterimen qatar, oqýshylarynyń da jetistigi esepke alynady. Biraq, másele tek «Altyn belgige» qatysty emes», - deidi ol.
