Biyl bilim grantyn taǵaiyndaý nátijesi 5 kún buryn jariialandy. Bul týraly elordada ótken brifingte QR Bilim jáne ǵylym vitse-ministri Fatima Jaqypova málim etti, dep habarlaidy QazAqparat.
«Búgin buqaralyq aqparat quraldarynda respýblikalyq konkýrstyń nátijesi jariialandy. Bul - respýblikalyq konkýrstyq komissiia jumysynyń nátijesi, iaǵni grant ieleriniń tizimi aiqyndaldy. Jalpy, biyl kokýrsqa 53 785 grant bólindi, qatysýshylardyń sany 64 452 adam boldy. Osy oraida bir grantqa ortasha konkýrs 1,29 adamdy qurady», - dedi F. Jaqypova.
Onyń sózine qaraǵanda, byltyrmen salystarǵanda biyl grant nátijeleri 5 kún buryn shyǵaryldy.
«Sonymen qatar, jyl saiyn memleket tarapynan joǵary bilim alýǵa múmkindikter keńeiýde. Jalpy granttardyń sanynda 45 paiyzdan astamy injenerlik, qurylys, IT-mamandyqtarǵa bólingen. 8 myńnan astam grant pedagogikalyq kásipke arnalǵan. 4 myń grant jaratylystaný ǵylymdary, matematika jáne statistikaǵa baǵyttaldy. Biyl konkýrsqa qatysqan «Altyn belgi» iegerleriniń sany 5 myń 800-den astam boldy, onyń 4 myń 600-den astamy grantqa ie boldy», - dedi vitse-ministr.
