QR Ulttyq mýzeiinde «Altyn adamnyń álem mýzeilerine sherýi» atty halyqaralyq kórme jobasynyń jyldyq qorytyndy baspasóz máslihaty ótti.
Is sharaǵa Qazaqstan Respýblikasy Mádeniet jáne sport ministri Arystanbek Muhamediuly; Qazaqstan Respýblikasy Ulttyq mýzeii direktorynyń m.a. Almaz Nurazhan; t.ǵ.d., professor Zeinolla Samashev, Ázirbaijannyń Ulttyq tarihi mýzeii direktorynyń orynbasary, t.ǵ.d. Mahfýza Zeinalova; Búkilreseilik qoldanbaly-sándik jáne halyqtyq óner mýzeiiniń Bas keńesshisi Galina Borisovna Andreeva; f.ǵ.d., Ázerbaijan Ulttyq ǵylym akademiiasynyń Ǵalym hatshysy Agagýsein Mamedgýsein ogly Shúkirov; Belarýs Ulttyq kórkemóner mýzeii Bas direktorynyń orynbasary Sergei Vladimirovich Vecher; Qytai Halyq Respýblikasy Soltústik-Batys politehnikalyq Ýniversitetiniń rektory Van Chjinsýn; Koreia Ulttyq mýzeiiniń Aziia óneri departamentiniń direktory, PhD Choi Seon Djý qatysty.
Atalǵan kórme jobasy Elbasynyń «Bolashaqqa baǵdar: rýhani jańǵyrý» atty maqalasy aiasynda biylǵy jyly qolǵa alynǵan bolatyn. Jobanyń maqsaty – Uly dalanyń ejelgi jáne dástúrli óner týyndylaryn álemniń aldyńǵy qatarly mýzeilerinde kórsetý arqyly elimizdiń tamyry tereń tarihyn, bai mádenieti men teńdessiz qolónerin pash etý, nasihattaý.
Qazaqstan Respýblikasy Mádeniet jáne sport ministri Arystanbek Muhamediuly: «Altyn adamnyń álem mýzeilerine sherýi» atty halyqaralyq ǵylymi konferentsiia jumystaryn bastap otyrmyz. «Altyn adamymyzdy» ózge memleketterge tanytyp, jaýhar jádigerlerimiz arqyly ǵalamdyq órkenietke úles qosyp, álemdik mádeniet deńgeiinen kórindik deýge bolady. Aldaǵy jyly atalǵan joba jalǵaspaq. Elbasynyń «Uly dalanyń jeti qyry» atty maqalasynda atap kórsetilgen «Altyn adamǵa» barynsha kóńil bólip, kópke kórsetý arqyly tól tarihymyzdy nasihattai túsemiz. Sonymen qatar, bolashaqta saq jaýyngerine qatysty zertteý jumystaryn jalǵastyryp, saq dáýirine tán jazba túrinde saqtalǵan qundy derekterdi izdestirýimiz qajet. 3 jyldan beri Koreia, Qytai elderiniń arheologtarymen birlesip, «Altyn adam» tabylǵan Esik qorǵany mańynda búgingi kúnge deiin zertteý jumystary belsendi túrde júrgizilip keledi. Áli de bolsa, tamyry tereń tarihymyzdy tolyqtyra túsetin aishyqty belgiler izdestirile bermek. Alǵash ret uiymdastyrylǵan «Altyn adamǵa» arnalǵan ǵylymi konferentsiia jumysyna sáttilik tileimin», - dedi.
Búgingi kúni «Altyn adamnyń álem mýzeilerine sherýi» atty halyqaralyq kórme jobasy álemniń 6 elinde, atap aitsaq, Belarýs, Ázirbaijan, Resei, Qytai, Polsha jáne Ońtústik Koreiada júzege asyrylyp, ony tamashalaǵandar sany 200 myń adamnan asty. Kórmege qoiylǵan jádigerler dala órkenietiniń tarihy, imperiialardyń joiqyn jeńisteri men ǵajaiyp kórinisteriniń kýási bolyp tabylady.
Koreia Ulttyq mýzeii, Zertteýler men josparlaý departamentiniń direktory, PhD Choi Seon Djý: «Biylǵy jyly Qazaqstan men Koreia arasyndaǵy diplomatiialyq qarym-qatynasqa 26 jyl tolyp otyr. Bizdiń mýzeide Qazaqstanda jasalǵan, VII ǵasyrǵa tán qazaqtardyń altyn qanjary bar. Ol Koreia Respýblikasynyń aýmaǵynan tabylǵan. Osy jádiger eki el arasyndaǵy yntymaqtastyq bailanystyń óte erte kezeńderden bastaý alǵanyn kórsetedi. «Altyn adamnyń» kórmesi Koreiada óte joǵary deńgeide uiymdastyryldy. Káris halqy kórmeden baǵaly eksponattymen qatar, búkil qazaq eliniń tarihymen, mádenietimen jáne salt-dástúrimen tanysty. Dál qazirgi ýaqytta jalǵasyp jatqan «Altyn adamnyń» kórmesine kelýshiler óte kóp», - dedi.
Ózge memleketterde uiymdastyrylǵan kórmelerde erte temir dáýirindegi alǵashqy dalalyq memleketter dáýiriniń murasy sanalatyn, ań stilindegi Esik bekzadasynyń altyn kiimi basty oryndy alsa, Batys Qazaqstandaǵy Taqsai abyzy men Araltóbe jaýyngeriniń, Saryarqadaǵy Taldy-2 bileýshisiniń, Qazaq Altaiyndaǵy Berel jylqylarynyń teńdessiz jádigerleri de osy atalǵan kórmelerge qoiyldy. Sonymen qatar qazaqtyń dástúrli mádenietiniń jaýharlary sanalatyn sándik qoldanbaly óner týyndylaryn kórsete otyryp, kórermenge Uly Dala eli mádenietiniń árbir jádigerinde tereń maǵynaly oi jatqandyǵy jáne sol ónerdiń sabaqtastyqta búginge deiin jetkendigi kórsetildi.
Baspasóz maslihaty barysynda alty elde ótken kórmelerdiń ǵylymi katalogtarynyń tusaýkeseri ótti.
