Kóshelerdi tekserý barysy joldardyń sapaly oryndalmaǵanyn kórsetedi. Bul týraly elorda ákimi Altai Kólginov jelidegi paraqshasynda jazdy, dep habarlaidy "Ult aqparat".
«Keibir joldardyń jóndelgenine áli 3-4 jyl tolmady, alaida jóndeý jumystaryn qaita júrgizý kerek! Turǵyndardyń shaǵymdary negizdelgen. Beiindi basqarmanyń mindeti tek merdigerlik uiymdardy anyqtaý úshin konkýrs ótkizip qana qoiý emes, sonymen birge joldyń sapasyn, uzaq ýaqyt qyzmet kórsetýin qamtamasyz etý! Adamdarǵa qolaily jaǵdai jasaý», - dedi ákim.
Ákim osy baǵytta birneshe tapsyrma berdi.
Birinshi. Kólik jáne jol-kólik infraqurylymyn damytý basqarmasyna jol shuńqyrlaryn jóndeýdi jedeldetýdi tapsyrdym.
Ekinshi. Joldardy ortasha jóndeýge kirisý qajet. Tizimge jóndeýdi qajet etetin joldardy engizý qajet. Adam kóp júretin, jańa salynyp jatqan aýdandardaǵy kóshelerge mán bergen jón. Sonymen qatar buryn asfalt tóselmegen kóshelerdi de qosý qajet. Byltyrǵydai qalanyń eski bóligi men eldi mekenderge de basa nazar aýdaramyz.
Úshinshi. Beiindi basqarma men jol qyzmetkerlerine qoiylǵan talap joǵary, suranys ta joǵary bolmaq! Sapasyz jumystar qabyldanbaidy. Josyqsyz merdigerlerdi sotqa berip, qara tizimge engizemiz.
Tórtinshi. «Qazavtojolǵa» eskertý jasaldy. Jóndeýde sapasyz materialdardy paidalanýǵa jol berilmeidi.
Besinshi. Asfaltbeton zaýytynyń jumysyn iske qosamyz. Bul jol jumystarynyń qarqynyn jedeldetýge múmkindik beredi.
«Jol qurylysy strategiialyq baǵytqa jatady. Qalada ómir súrýge jaily jaǵdai jasaý mańyzdy. Byltyr 170-ten astam kóshe jóndeldi. Onyń 100-i – eldi mekenderde. Biyl ba byltyrǵy kórsetkishten kem túspei, jumys atqaramyz», - dep túiindedi ákim.
