Elordada 11 mamyrdan keiin qoǵamdyq kólikterdiń qozǵalysy jandanýy múmkin. Bul týraly «Astana» telearnasyna suhbat bergen elorda ákimi Altai Kólginov aitty, dep habarlaidy "Ult aqparat".
«Biz 11 mamyrdan keiin qoǵamdyq kólikterdiń qozǵalysyn jandandyrýdy memlekettik komissiiaǵa usynýdy josparlap otyrmyz. Epidemiologiialyq ahýaldy da baqylaityn bolamyz. Munan ary ustap turýǵa bolmaidy. Degenmen, jańa talaptar bolady, júrgizýshi qorshalady jáne bailanysty tómendetý úshin qolma-qol aqshasyz jolaqy tóleý qoldanylady. Jolaýshylar maskamen, qolǵappen júrýleri qajet. Antiseptik qoldanǵany jón», - dedi qala basshysy.
Elorda ákiminiń aitýynsha, qazirgi ýaqytta qala dárihanalarynda qorǵanys quraldary bar. Olarǵa 5 mln maska jetkizildi. Munan bólek, turmysy tómen adamdarǵa 2 mln maska tegin taratyldy.
«Buǵan qosa, Halyqqa qyzmet kórsetý ortalyqtarynyń jumysyn da jandandyrýdy kózdep otyrmyz. Ol jerde de jańa talap - ara-qashyqtyq 1,5-2 metr bolýy tiis. Ony syzyp ta qoidyq. Muny Arnaýly halyqqa qyzmet kórsetý ortalyqtarynda, bankterde, azyq-túlik, azyq-túlikke jatpaityn taýarlar, qurylys zattary dúkenderinde beiimdeýden ótkizdik. Iaǵni, biz kezekte turyp úirenýimiz qajet. Ózimizdi qorǵaý úshin áleýmettik ara qashyqtyqty saqtaýǵa tiispiz. Bul da mańyzdy mádeniet», - dedi Altai Kólginov.
