QR Qarýly Kúshteriniń áskeri qyzmetshisi, kapitan Maqsut Jumaev Qyrǵyzstan taýlarynda joǵalǵan qazaqstandyq alpinisterdi izdestirý jumystarynyń búgingi nátijesi týraly málim etti, dep habarlaidy QazAqparat.
«Tańerteń Jeńis shyńyn tikushaqpen aralap shyqtyq. Joǵalǵan alpinisterdi izdestirýdiń boljamdy territoriiasy belgilendi. Ol jerge tikushaqtarmen segiz ret sholý júrgizdik. Alpinister bolýy múmkin jerlerdi qaraýdy tańerteń jalǵastyrý sheshimi qabyldandy. Jumystar jalǵasýda. Aýa raiy jaǵdaiy da buǵan múmkindik berip otyr. Erteń tańerteń kún raiyna qarai qaita ushamyz», - dedi ol QR Qorǵanys ministrligi usynǵan videoda.
Ministrlik buǵan deiin usynǵan málimette Qazaqstan áskerileri Qyrǵyzstanda Jeńis shyńyn teplovizormen sholǵyndap, ainala ushyp shyqqanyn málim etken bolatyn. «Qazirgi ýaqytta olar bazalyq lagerde. Teplovizordyń kómegimen alynǵan aqparatty óńdep jatyr. Sodan keiin budan ári qalai áreket etý kerektigi sheshiletin bolady», - delingen edi aqparatta.
Eske salsaq, almatylyq alpinister Murat Ótepbaev, Andrei Korneev jáne Aleksandr Chechýlin Qyrǵyz taýlarynda joǵalyp ketti. Almaty qalasynyń ákimi Baqytjan Saǵyntaev alpinister tobynyń iz-túzsiz ketýine qatysty Instagram paraqshasynda alańdaýshylyq bildirdi. Keiinirek quzǵa órmeleýshilerdiń biriniń qyzy áleýmettik jeli arqyly qalyń kópshilikten kómek surady. Kóp uzamai QR Qorǵanys ministrligi alpinisterdi qutqarý operatsiiasyn bastaǵanyn málim etti. Qutqarýshylar tobyna áigili alpinist Maqsut Jumaev jetekshilik etýde.
QR Syrtqy ister ministrliginiń aqparatyna sáikes, 2019 jyldyń 17 tamyzynda Bishkektegi qazaqstandyq konsýldyqqa Qazaqstannyń 3 alpinisi Tian-Shan taýynyń (Qyrǵyzstan, Ystyqkól oblysy) Jeńis shyńynda joǵalyp ketkendigi týraly aqparat tústi. Qazaqstan azamattary Murat Ótepbaev, Andrei Korneev jáne Aleksandr Chechýlinniń 4 tamyz kúni Jeńis shyńyna saparlap shyqqandyǵy anyqtaldy. Olardyń barlyǵy da kásibi jáne tájiribeli alpinister. 14 tamyzda olar atalǵan shyńdy baǵyndyrǵan. Sol kúni aýa raiy nasharlap ketken.
Alpinister 15 tamyz kúni shamamen saǵat 08.15-te sońǵy ret bailanysqa shyǵyp, oryn alǵan jaitqa qatysty dabyl qaqqan. Sondai-aq, olar A.Chechýlinniń qaza tapqandyǵyn estirtken. Alpinister dabyl qaqqan sátte olar 6 900 metr biiktikte bolǵan. Shatyrlary men jabdyqtaryn jel ushyryp ketken. Olar qardan shuńqyr qazyp, soǵan jasyrynǵandyqtaryn aitqan.
