Qyrǵyzstannyń burynǵy prezidenti, 8 tamyzda ustalǵan Almazbek Atambaevtyń jieni Nýrbek Sharshenov jáne eks-prezidenttiń burynǵy jaqtasy Kýndýz Ajybekovany memlekettik ulttyq qaýipsizdik komitetiniń Shý oblystyq basqarmasyna jetkizgen.
Bul aqparatty Qyrǵyzstannyń sotsial-demokratiialyq partiiasynyń (QSDP) ókili Kýndýz Joldýbaeva habarlady. Onyń aitýynsha, eki qyzmetkerdi de arnaiy qyzmet ókilderi Koi-Tashtaǵy Atambaev úiinen kólikke otyrǵyzyp, alyp ketken, dep jazady Azattyqtyń Qyrǵyz qyzmeti.
Kýndýz Joldýbaevanyń ózi buǵan deiin ishki ister ministrligi birneshe ret tergeýge shaqyrǵanyn aitqan.
7 tamyzda bastalǵan Atambaevty ustaý operatsiiasy arnaiy jasaq pen eks-prezident jaqtastarynyń qaqtyǵysyna ulasyp, bir áskeri qaza tapqan. Ondaǵan adam jaralandy. Arnaiy jasaqtyń alty sarbazyn burynǵy prezidenttiń jaqtastary kepilge alyp, erteńine bosatqan.
Atambaev 8 tamyzda jalǵasqan operatsiia kezinde óz erkimen bilikke berildi. Oǵan jemqorlyq aiyby taǵylyp, eks-prezident 26 tamyzǵa deiin qamaýǵa alyndy. Qazir onyń isi tergelip jatyr.
Sońǵy birneshe kúnde Atambaevtyń jaqtastary tergelip, tórt adam qamaýǵa alynǵan. Bular: Atambaevtyń burynǵy keńesshisi Farid Niiazov, QSDP ókilderi Alga Kylychev, Kyiaz Ismailov, Amantýr Jamgyrchiev. Olardyń barlyǵy qazir Bishkek politsiiasynyń tergeý iziaoliatorynda otyr.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady. Úsh ret shaqyrtý jibergenimen tergeýge barmaǵan Atambaevty ministrlik arnaiy operatsiia júrgizip, kúshtep ákelýdi tapsyrǵan.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitqan. Atambaev Qyrǵyzstandy 2011-2017 jyldary basqarǵan. Onyń ornyna bilikke 2017 jyldyń sońynda sailaý jolymen Sooronbai Jeenbekov kelgen.
