8 tamyzda Qyrǵyzstan qarýly kúshteri Koi-Tashta eldiń burynǵy prezidenti Almazbek Atambaevty ustady. Bul týraly reseilik jáne qyrǵyzstandyq aqparat quraldary habarlady.
Tilshilerdiń habarlaýynsha, eks-prezident úiinen qarýly kúshterdiń eki kóligi shyǵyp ketken. Jýrnalister bir kóliktiń ishinen Atambaevty kórgen.
Aqparatty Qyrǵyzstan Respýblikasy IIM baspasóz qyzmeti de rastap otyr.
«2019 jyldyń 8 tamyzynda militsiia qyzmetkerleri Qyrǵyz Respýblikasynyń MUQK qyzmetkerlerimen birlesip eriksiz keltirý boiynsha júrgizgen is-sharalary nátijesinde A.Sh.Atambaev ustaldy», - delingen habarlamada.
IIM-de atap ótkendei, tergeý-jedel is-sharalaryn júrgizý kezinde eshkim zardap shekken joq.
Ustaý kezinde arnaiy operatsiia ornynda Qyrǵyz Respýblikasynyń ishki ister ministri Kashkar Djýnýshaliev pen onyń orynbasary militsiia polkovnigi Almaz Orozaliev jetekshilik etken.
IIM-de habarlaǵandai, Atambaev Qyrǵyz Respýblikasy zańnamasyna sáikes ári qarai tergeý sharalaryn júrgizý úshin sáikes organdarǵa jetkizildi.
Qyrǵyzstannyń qarýly kúshteri Atambaevty ustaý úshin arnaiy operatsiiany 8 tamyz tústen keiin qaita bastaǵan. Arnaiy jasaq pen politseiler 16.00 shamasynda Atambaevtyń Koi-Tashtaǵy úiin qorshaýǵa aldy. Al Atambaevtyń jaqtastary Koi-Tashqa kireberisti jaýyp, arnaiy jasaq kúshterine tas laqtyrǵan. Eldiń densaýlyq ministrligi 8 tamyz tústen keiingi janjal kezinde bes adam jaralanǵanyn habarlady. Onyń tórteýi - politsei.
Qyrǵyzstan memlekettik ulttyq qaýipsizdik komiteti eldiń burynǵy prezidentin tergeýge áketý úshin 7 tamyz keshkisin Koi-Tashtaǵy úiine barǵan. 8 tamyz túngi úsh shamasynda arnaiy jasaq Koi-Tashtan shyqty. Ol kezde kúshtik qurylymdar Almazbek Atambaevty úiinen ákete alǵan joq. Operatsiia kezinde arnaiy jasaqtyń bir múshesi qaza bolyp, 52 adam jaralanǵan.Olardyń jartysy - arnaiy jasaq ókili. Qazir 31 adam aýrýhanada jatyr. Shý aýdany ishki ister basqarmasynyń bastyǵy Samat Qurmanqulova es-tússiz jatyr. Oǵan eki ret operatsiia jasalǵan.
27 maýsymda Qyrǵyzstan parlamenti Almazbek Atambaevty eks-prezident jáne tiispeýshilik mártebesinen aiyrǵan. Keiin IIM Atambaevty tergeýge shaqyra bastady.
Qyrǵyzstannyń burynǵy prezidentine qyzmette júrip jemqorlyqqa jol berdi, ókiletin asyra paidalandy jáne zańsyz baiydy degen siiaqty jalpy sany bes aiyp taǵylǵan. Prokýratýra Atambaev qylmystyq toptar arasynda tanymal Aziz Batýkaevtyń zańsyz bosatylýymen bailanysty iste kýáger retinde tanylǵanyn málimdegen.
Atambaev bul aiyptardyń bárin joqqa shyǵaryp, ózin tergeýge shaqyrýdyń saiasi astary bar dep málimdegen. Ol Aziz Batýkaevty bosatýǵa qatysy joǵyn da aitady.
Atambaev Qyrǵyzstandy 2011-2017 jyldary basqarǵan. Onyń ornyna bilikke 2017 jyldyń sońynda sailaý jolymen Sooronbai Jeenbekov kelgen.
