Keibir elderde vaktsinalaýdyń keshigýi koronavirýstyń jańa nusqalarynyń paida bolýyna ákelýi múmkin. Bul týraly profilaktikalyq meditsina akademiiasynyń prezidenti, Amerika densaýlyq saqtaý qaýymdastyǵynyń múshesi Almaz Sharman onlain brifing barysynda aitty, dep habarlaidy QazAqparat.
Professordyń sózinshe, virýstyń shtamdary men varianttaryn ajyratý qajet. Keibir tehnikalyq aiyrmashylyqtar bar.
«Biz koronavirýstyń ár túrli nusqalary týraly aityp jatyrmyz. 1 maýsymnan bastap Dúniejúzilik densaýlyq saqtaý uiymy olardy grek alfaviti áripterimen, iaǵni – «alfa», «beta», gamma, «delta» dep atap keledi. Jalpy pandemiia bastalǵaly búkil álemde kóptegen nusqalar tirkeldi. Shamamen ai saiyn eki nemese úsh nusqa paida boldy. Sonymen qatar tiimdi vaktsinalardyń paida bolýymen mýtatsiianyń jiiligi jyldamdady. Bul tabiǵi evoliýtsiialyq protsess, - dedi professor.
Onyń aitýynsha, virýs tiri qalýdyń jolyn izdep, belsendi túrde mýtatsiialana bastaidy.
«Is júzinde, virýstyń tek 30 myń nýkleotid negizi bar jáne onyń mýtatsiialyq nusqalarynyń sany shekteýli. Virýstardyń birneshe nusqalary bar, olar juqpaly jáne vaktsinalarǵa tózimdi bolýy múmkin, biraq olar juqpalylyǵyn joǵaltady. Bul alfa, beta jáne gamma nusqalarymen boldy. Biz qazir «deltanyń» óte juqpaly nusqasymen kúresip jatyrmyz. Bul koronavirýstyń sońǵy agressivti nusqasy dep oilaimyn jáne bolashaqta pandemiia báseńdeýi kerek», - dedi Almaz Sharman.
Spiker virýstyń ońtústikafrikalyq nusqasynyń vaktsinaǵa tózimdi ekeni anyqtalǵanyn jetkizdi. Alaida ol tez juqpaityn kórinedi. Al «delta» nusqasy ózinen burynǵylardy yǵystyryp, qaýipti ári juqpaly bolyp shyqqan.
Sonymen qatar, ol virýstyń shtammdary men nusqalaryn shatastyrmaýdy surady. Ol shtamdar virýstyń taǵy bir sapalyq sipattamasy ekenin atap ótti.
