Belgili immýnolog Almaz Sharman Qazaqstandaǵy epidemiologiialyq jaǵdaidy aisbergke qarsy júzgen kemege teńedi, dep habarlaidy "Ult aqparat".
Ortalyq kommýnikatsiialar qyzmetindegi baspasóz máslihatyna tikelei bailanys arqyly qosylǵan Profilaktikalyq meditsina akademiiasynyń prezidenti, Amerika densaýlyq saqtaý qaýymdastyǵynyń múshesi, professor, immýnolog Almaz Sharman COVID-19 indetiniń «jasaryp» kele jatqanyn aityp, dabyl qaqty.
«Balalar koronavirýstyń «delta» nuqasymen 5 ese jii aýyratyn boldy. Iaǵni, COVID-19 «jasaryp» ketken. Biraq infektsiianyń bala aǵzasynda qanshalyqty agressivti damityny ázirge belgisiz. Eresek adamdarǵa kelsek, ekpe almaǵandardyń shaldyǵýy joǵary bolyp tur. Sondyqtan vaktsina koronavirýs infektsiiasynyń «delta» jáne ózge de nusqalaryna qarsy qoldanatyn jalǵyz qarý bolyp otyr», - dedi professor.
Maman delta-shtamdy virýstan tolyqtai qorǵaný úshin vaktsinanyń eki komponentin de tolyq alý kerektigin eskertti.
«Vaktsinanyń birinshi komponenti «delta» nusqadan 17 paiyz nashar qorǵaidy. Ekinshi komponent alǵannan keiin qorǵanysh qabileti qalypqa túsedi. Epidemiianyń «delta» nusqasy ekpe alǵandar men almaǵandardyń arasyndaǵy keńistikti odan ári keńeitip jiberdi. Juqtyrý jáne ólim-jitim táýekeli boiynsha eki sanattaǵy adamdar eki túrli álemde ómir súrip jatyr deýge bolady. Ekpe alǵandar óziniń immýndyq júiesi delta-shtamnan qorǵaitynyna sene alady. Al vaktsina almaǵandar pandemiianyń eń qaýipti fazasyna ótkenin túsinýleri kerek. Koronavirýstan emdeitin dáriniń joq ekenin umytpaý qajet. Qazir biz onyń saldaryn ǵana emdep jatyrmyz. Qan suiyltatyn jáne qabynýǵa qarsy dáriler, ókpeni jasandy jolmen jeldetý tásilderiniń bári – saldarymen kúresý ǵana», - dedi sarapshy.
Amerika densaýlyq saqtaý qaýymdastyǵynyń múshesi Almaz Sharmannyń aitýynsha, búginde álem boiynsha 3 milliardtan astam vaktsina salynǵan.
«Álemdegi ár 100 adamnyń 39-y vaktsina alǵan. Biraq AQSh, Izaril jáne Eýropa elderinde vaktsinalaý kórsetkishi jaqsy bolǵanymen, álemniń basqa óńirlerinde ekpe qarqyny báseń. Qazaqstanda halyqtyń tek 17 paiyzy ǵana vakinanyń birinshi dozasyn, 10 paiyzy eki dozasyn birdei alǵan. Men eldiń 80 paiyzdan astamy ekpe almaǵan Qazaqstannyń jaǵdaiyn aisbergke qarsy júzgen kemege teńer edim. Vaktsina aisbergtiń erýin jyldamdatatyn qural bolyp otyr. Epidemiologiiaǵa qarsy sharalardyń kez kelgen túri ásirese, aisbergke soǵylý qaýpi joǵarylaidy. Qazirgi 80 paiyz halyqtyń ekpe almaýy bizge jetkiliksiz. Bulai kete berse, aisbergke soǵylatynymyz aiqyn», - dedi immýnolog.
