Almatyda «Almatynyń vizit ortalyǵy» («Visit Almaty») atty týristik aqparattyq ortalyq resmi túrde ashyldy. Megapolis basshysy Baýyrjan Baibek qalaǵa kelgen árbir sheteldik qonaqtyń kórikti jerler, mádeni oqiǵalar, meimanhanalar týraly «bir tereze» printsipi boiynsha tolyq málimetti qalai alatyndyǵymen tanysty.
Qalalyq Týrizm jáne syrtqy bailanystar basqarmasynyń basshysy Erlan Jailaýbai vizit ortalyqtyń Almaty turǵyndary men qonaqtaryna megapolistiń týristik áleýeti týraly kásibi keńes, jol kartalary men taý baǵyttarynyń atlastaryn, týroperatorlar broshiýralaryn, mádeni-buqaralyq sharalardyń anonstaryn beretindigin aitty. Sonymen qatar, ekskýrsiiaǵa, estelik, sándik buiymdarǵa tapsyrys alatyndyǵy, eń bastysy, týrister úshin mobildi bailanys operatorynyń SIM-kartasyn beiimdeýdi júzege asyratyndyǵy atalyp ótti. Qazirgi kezde barynsha tanymal lokatsiialarda aqparattyq týristik kioskiler ashý máselesi qarastyrylýda. Basqarma basshysy mundai ortalyqty ashý Parij, London, Dýbai, Niý-Iork, Barselona syndy týrizm salasy damyǵan qalalar tájiribesinen alynǵandyǵyn jetkizdi.
– Qazirdiń ózinde www. visitalmaty.kz resmi saity jumys isteýde, keiin ol jeti tildi qamtityn bolady. Saitta qalanyń belgili kórneki oryndary, ulttyq mázir daiyndaityn meiramhanalary, kúndelikti ótetin mádeni sharalar tizbegi týraly tolyq aqparattar jariialanady. Vizit ortalyqta keńes berý aimaǵy, sývenir aimaǵy, sóilesý aimaǵy bar, sondai-aq túrli sharalar ótkizetin interaktivti aimaqpen de qamtamasyz etilgen. Tehnikalyq turǵydan ashylǵaly beri bul jerge 109 týrist habarlasty, – dedi ortalyq direktory Ásel Nurkebaeva.
Ol saiahatshylar úshin tótenshe jaǵdai týyndaǵan kezde túrli máseleni jedel sheshetin shuǵyl jeli qurylǵanyn da atap ótti.
Jalpy, «Almatynyń vizit ortalyǵyn» bolashaqta memlekettik-jekeshelik áriptestiktiń katalizatoryna jáne Almaty klasteriniń týristik developmentine ainaldyrý josparlanǵan. Halyqaralyq naryqta týristik áleýetti kórsetý jobalaryn júzege asyrý, óńirdiń reitingi men básekege qabilettiligine taldaý jasaý, týrizmdi damytý múmkindikterin izdestirý, osy salada túrli zertteýler júrgizý TAO jumysynyń basty bóligi bolady.
