Almaty qalasynyń Túrksib aýdanynda antiterrorlyq operatsiia rejimi engizildi. Bul týraly Terrorizmge qarsy kúres jónindegi qalalyq jedel shtabtan málim etti, dep habarlaidy QazAqparat.
«Terrorizmge qarsy kúres jónindegi qalalyq jedel shtab aǵymdaǵy jyldyń 26 qańtarynda saǵat 00.00-den 27 qańtar saǵat 00.00-ge deiin Almaty qalasy Túrksib aýdany aýmaǵynda antiterrorlyq operatsiia rejimi engizilgenin habarlaidy», - delingen málimette.
Eske salsaq, biylǵy 4-6 qańtar aralyǵynda terrorizmge qarsy operatsiialar barysynda Almatydaǵy memlekettik mekemeler men kommertsiialyq nysandarǵa qaraqshylyq shabýyl jasaǵan uiymdasqan qylmystyq toptyń 5 basshysy men músheleri ustalǵan edi.
Tutqyndaý kezinde kúdiktilerden qarý-jaraq («PM», «TT» markaly tapanshalar, kesilgen sholaq myltyq, olarǵa arnalǵan patrondar), untaq tárizdi zat jáne erekshe iisi bar tabletkalar tabyldy.
«Arnaiy jáne quqyq qorǵaý organdary jappai tártipsizdikterge qatysýshylar men uiymdastyrýshylardy anyqtaý boiynsha jedel-izdestirý operatsiialaryn jalǵastyrýda.
Quqyq qorǵaý organdarynyń jumysyna túsinistikpen qaraýdy, olardyń zańdy talaptaryn qatań saqtaýdy suraimyz», - dep atap ótti Terrorizmge qarsy kúres jónindegi Almaty qalalyq jedel shtabynan.
