Almaty mańyndaǵy alǵashqy ekologiialyq beket óz jumysyn bastady. Bir táýlikte elýge jýyq kólik toqtatylyp, olardan shyǵatyn ziiandy zattardyń mólsheri ólshendi, dep habarlaidy QazAqparat.
Jańartylǵan ekoposttarda kópkomponentti gazanalizatorlar qoldanylady. Sol arqyly benzin jáne gazben júretin kólikterden shyǵatyn ziiandy zattardy ólsheidi. Iaǵni, kómirsýtekter, kómirtek totyǵy, kómirqyshqyl gazy, azot oksidteri tekseriledi. Dizelmen júretin kólikter de nazardan tys qalmaidy.
«Qulja tas jolyndaǵy ekologiialyq bekettiń jumys istep turǵanyna 10 jyldai ýaqyt boldy. Osy ýaqyt aralyǵynda ol eskirdi. Sondyqtan ony qaita qalpyna keltirdik. Gazdardy ólsheýge arnalǵan qondyrǵysy bar jańa modýldik ǵimarat ornatyldy. Jańartylǵan ekopost qarasha aiynan bastap testilik rejimde jumys istei bastady. Jaqyn arada taǵy osyndai 17 ekopost paida bolady. Jer ýchaskesi bólindi. Eki apta saiyn bir ekopost iske qosylady. Byltyr aýa sapasyn baqylaýǵa arnalǵan 10 avtomatty stantsiia ornattyq. Stantsiialar atmosferadaǵy lastaýshy zattardyń kólemin, sondai-aq ylǵaldylyq, temperatýra, qysym, jel baǵyty men jyldamdyǵyn ólsheidi», - dedi Almaty qalalyq jasyl ekonomika basqarmasy bastyǵynyń orynbasary Aidyn Temeshev.
Ekopostarda kólikterden shyǵatyn ziiandy zattardy ólsheýge arnaiy oqytylǵan 60 – tan astam maman jumyldyrylady.
19 ekoposttyń árqaisysy úshin jospar quryldy, oǵan sáikes kúnine 500-den astam kólik tekserilýi kerek.
«Jańartylǵan ekopost jumysyn keshe bastady. Bir táýlikte 48 kólik toqtatyldy. Onyń ishinde jeti avtokólik iesine hattama toltyryldy. Ákimshilik aiyppul 434-bap boiynsha salynady. Birinshi ret eskertý retinde 2 AEK aiyppul salynady, eger kólik quraly ekinshi ret toqtatylsa, onda 5 AEK, al eger ol úshinshi ret qaitalansa, avtokólik iesi 10 AEK kóleminde aiyppul tóleýi kerek. Sondyqtan, eskertý alǵannan keiin avtokólik iesi mashinasyn memlekettik standartqa jáne zerthanalyq tekserýden ótkizý qajet», - dep qosty Almaty qalalyq jergilikti politsiia qyzmeti bastyǵynyń orynbasary Erjan Uzabaev.
