Almaty ákimi Baqytjan Saǵyntaev infektsiialyq statsionarlardyń jaǵdaiyn tekserdi, dep habarlaidy QazAqparat.
Almaty ákimi I.Jekenova atyndaǵy Juqpaly aýrýlar aýrýhanasynyń filialyna bardy.
Munda koronavirýspen aýyratyn 199 emdelýshi bar. Statsionarda 500 tósek bolsa, onyń 45-i reanimatsiia jáne qarqyndy terapiia bóliminde.
№ 12 jáne 7 qalalyq klinikalyq aýrýhanalarynda B.Saǵyntaev KVI juqtyrǵandardy qabyldaý qalai júrgiziletinin bildi. Bas dárigerler kovid bólimsheleriniń jumysy jalpy meditsinalyq kómek kórsetýmen qatar júrgiziletinin aitty. Qazirgi tańda kovidtik statsionarlarda 9 340 tósek-oryn bar, onyń 3 310-y bos emes, rezervte 6 030 oryn bar.
Qala ákimine Ortalyq qalalyq klinikalyq aýrýhanalar bazasynda ashylǵan Telemeditsina ortalyǵynyń jumysy týraly da baiandaldy. TMO mamandarynyń baqylaýynda 10 188 patsient bar. Bul san aǵymdaǵy jyldyń 1-20 qańtar aralyǵynda 20 ese ósken.
Sondai-aq KVI-di emdeý boiynsha usynymdar berý úshin emdelýshilerge kúnine orta eseppen 5 myń qońyraý shalynady. 20 qańtarda 8 458 qońyraý soǵylyp, naýqastardyń jaǵdaiy suraldy.
Budan bólek, Baqytjan Saǵyntaev №7 aýrýhana bazasynda ornalasqan KVI-ǵa qarsy vaktsinalardyń qalalyq qoimasyna bardy. Qoima men egý pýnkterinde Sinopharm vaktsinasynyń 207 733, QazVac vaktsinasynyń 176 349, Pfizer preparatynyń 254 782 dozasy bar.
