«Indýstrialdy aimaq - Almaty» JShS direktory Berikbol Mándibaev onlain brifingte qaladaǵy shaǵyn óndiristik parkterdi damytý jobasy týraly aityp berdi, dep habarlaidy QazAqparat.
«2021 jyly jáne odan keiingi jyldary 5,5 myńnan astam jumys ornyn qurýǵa múmkindik beretin, quny 160 mlrd teńge turatyn 38 jobany iske qosý josparlanyp otyr»,– deidi Berikbol Mándibaev.
Budan bólek, 2020 jyldyń sońyna deiin Almatynyń Indýstrialdy aimaǵynda tórt shaǵyn óndiris parki iske qosylady. Qazirgi ýaqytta qurylys kompaniialary («KazStroyTrade» JShS, «D&J «Industries & Logistic» JShS, «Ala Estate» JShS, «ADS Industries» JShS) jobalyq jumystardy aiaqtap qaldy.
Óndiris ǵimarattarynyń jalpy aýmaǵy 36 myń sharshy metr. Olarǵa qurylys, jihaz, jeńil jáne taǵam ónerkásibi salasyndaǵy óndiris oryndary ornalastyrylady. Óndiristik parkterde bir myńnan astam jańa jumys ornyn ashý josparlanǵan.
«Shaǵyn óndiris parkterin damytý jobasy «Almaty biznes – 2025» shaǵyn jáne orta kásipkerlikti damytý baǵdarlamasy boiynsha júzege asyrylýda. Onyń aiasynda qala aýmaǵynda óndiris ǵimarattaryn investorlar men óndiris bazalarynyń menshik ieleri salady. Óndiris ǵimarattary shaǵyn jáne orta biznes sýbektilerine jeńildetilgen sharttarmen: 5-7 jylǵa deiingi merzimge devalvatsiialyq qaýipke qaramastan beriledi. Ǵimaratty jalǵa alý quny sharshy metr úshin 1000-1200 teńgeni quraidy. Ǵimaratty satyp alý quny sharshy metr úshin 145 000 teńge. Almaty qalasynyń aýmaǵyndaǵy Indýstrialdy aimaqta shaǵyn óndiris parkin salý isine qatysýǵa 70-ten astam kompaniia qyzyǵýshylyq bildirdi» – deidi «Indýstrialdy aimaq - Almaty» JShS direktory Berikbol Mándibaev.
