Almaty ákimdiginde «Almatynyń erekshe mártebesi týraly zańnan» qandai ózgeris kútýge bolatyny jaily aityldy, – dep habarlaidy QazAqparat.
«QR Prezidenti Qasym-Jomart Toqaevtyń joldaýynda Úkimetke úsh iri qalanyń ákimdikteriniń quzyryn keńeitý týraly tapsyrma berilgen bolatyn. Atap aitqanda, olarǵa qala qurylysy saiasaty, kólik infraqurylymy, sáýlettik kelbetin ózgertýge quzyryn keńeitý týraly aitylǵan. Joldaýdan soń QR Ulttyq ekonomika ministrligi men memlekettik organdar birige otyryp QR Úkimetine usynystar engizildi. Osylaisha 28 jeltoqsanda Memleket basshysy tiisti jarlyqqa qol qoiyp, «Almaty qalasynyń erekshe mártebesi týraly zań» qabyldandy» dedi Almaty ákiminiń orynbasary Muhit Ázirbaev.
Onyń aitýynsha, osy ózgeristermen qatar QR «Memlekettik jergilikti basqarý jáne ózin-ózi basqarý týraly zańǵa» birqatar ózgeris engizildi. Bul zańda Almaty ákimdiginiń tarapynan 28 túrli usynys berilgen. Zańǵa sáikes Almaty ákimdigi zań sheńberinde berilgen tártipte Almatynyń qurylysy men bas jospary boiynsha qyzmet jasaityn sýbektilerdiń jumysyn úilestirýge, Almaty mańaiyna jatqyzylǵan territoriialardaǵy qala qurylysy jumystarynda keshendi keste qurý jumystaryna aralasatyn boldy.
Onyń aitýynsha, Úkimetke Almaty aglomeratsiiasynyń 2020 jylǵa deiingi damýy boiynsha aimaqaralyq naqty jospar berildi. Bul qujatta aimaq turǵyndaryn baspanamen, áleýmettik qyzmettermen, jańa jumys oryndarymen qamtý kózdelgen.
«Taǵy bir aita keterligi, ákimdik quzyryna endi qala qurylysyn josparlaý men sáýlettik kelbetin quzyrly organdarmen kelisýdi bekitý kiredi» dedi ákimniń orynbasary.
