Almaty qalasynyń ákimi Baqytjan Saǵyntaev megapolis turǵyndarymen eseptik kezdesýi kezinde qalany odan ári damytýdy qamtamasyz etý maqsatynda uzaq jáne orta merzimdi qujat ázirlengenin málim etti, dep habarlaidy QazAqparat.
Atap aitqanda, halyqtyń ómir súrý sapasyn arttyrýǵa jáne ekonomikanyń ósýine baǵyttalǵan tórt mańyzdy qujat daiyndaldy: «Almaty-2050» damý strategiiasy, «Jańa Almaty» atty shetki aimaqty damytýdyń keshendi jospary, Almaty aglomeratsiiasyn damytý boiynsha «Úlken Almaty» jospary, «Almatynyń erekshe mártebesi týraly» Zańdy iske asyrý.
«Almaty-2050» damý strategiiasy — bul qala bolashaǵynyń kórinisi. Strategiia shahardy damytýdyń túbegeili jańa kezeńin ashyp, úsh qaǵidaǵa negizdeledi: jańa ekonomika, jańa keńistik jáne jańa kommýnikatsiialar. 2050 strategiiasy 7 negizgi baǵytty qamtidy: shetsiz qala, aqyldy qala, teń múmkindikter qalasy, qaýipsiz qala, jasyl qala, jahandyq iskerlik ortalyq, mádeni ári kreativti qala. «Shetsiz qala» qaǵidasy erekshe mańyzǵa ie. Bul –aýdandardy damytýda tepe-teńdikti saqtaýǵa, qalanyń barlyq turǵyndarynyń ómir súrý sapasyn arttyrýǵa múmkindik beredi.
«2020-2024 jyldarǵa arnalǵan «Jańa Almaty» jospary. Sońǵy 10 jylda qalanyń aýmaǵy eki ese ósti. Bul rette jańa aýdandardy infraqurylymmen qamtamasyz etý qajettiligi kúrt ósti. Jospar boiynsha 2030 jylǵa qarai almatylyqtardyń sany 3 mln adamǵa jetý múmkindigi kórsetilgen. Osyǵan bailanysty qala ákimdigi megapolisti damytýdyń besjyldyq kezeńge arnalǵan keshendi josparyn ázirledi. Úkimet ony bekitti. Basty maqsat — áleýmettik máselelerdi sheshý jáne halyqtyń ómir súrý sapasyn jaqsartý. Buǵan injenerlik jelilerdiń tozýyn tómendetý, ortalyqtandyrylǵan sýmen jabdyqtaýdy jáne jaryqtandyrýdy 100%-ǵa jetkizý, joldardyń sapasyn jáne t. b. jaqsartý mindetteri kiredi»,- deidi Saǵyntaev.
Almaty aglomeratsiiasynyń jospary ishki kóshi-qon máselelerin sheshedi. Josparǵa sáikes, úlken Almatyny damytýda kólik infraqurylymy máselesine erekshe kóńil bólinbek. Osy jospardy iske asyrý maqsatynda Úlken Almaty ainalma joly, 6 kóshe, qala aýmaǵynda 3 kólik torabynyń qurylysy, oblystyń 5 eldi mekeninde avtovokzal salý josparlanýda.
Azyq-túlik beldeýin uiymdastyrý maqsatynda qala ainalasynda 4 kóterme-taratý ortalyǵy, 2 et kombinaty, 7 jylyjai, 2 sút fermasy salynatyn bolady. Almaty aglomeratsiiasy jańa josparynyń arqasynda qala mańy kópsalaly aimaqtar retinde damidy dep kútilýde.
«Almaty qalasynyń erekshe mártebesi týraly» zańda kórsetilgen 28 másele boiynsha ákimdiktiń quzyreti keńeitilýde. Zańnamalyq ózgerister ákimdikke qalalyq ortany, jer aktivterin, kólik jáne basqa da qalalyq qyzmetterdiń jumysyn, áleýmettik, sondai-aq qala qurylysy men sáýlet suraqtaryn basqarý boiynsha keń aýqymdy máselelerdi sheshýge múmkindik beredi», - dep qosty shahar basshysy.
Aita keteiik, megapolis ákiminiń eseptik kezdesýine 3200 myń adam qatysyp jatyr.
