Almatylyqtar mekenjai boiynsha turaqty tirkeýge turý úshin Halyqqa qyzmet kórsetý ortalyǵynyń onlain balamasy – egov.kz tańdai bastady, dep habarlaidy "Ult aqparat".
Almatyda mekenjai tirkeýine onlain túrde turýshylar sany artty. Jyl basynan beri – bul qyzmetti alý úshin 39462 adam front-ofisterge júginse, 20873 azamat eshqaida barmai-aq onlain túrde júzege asyrǵan.
«Byltyrǵy kórsetkishterdi esepke alatyn bolsaq, Almaty qalasyndaǵy «Azamattarǵa arnalǵan úkimettiń front-ofisteri arqyly 216196 adam, onlain túrde 43967 adam tirkeý rásimin júzege asyrǵan. Respýblika boiynsha 1,5 mln adam front-ofister arqyly, onlain túrde 479 myń adam tirkeý rásimin júzege asyrǵan, sáikesinshe ár tórtinshi azamat turǵylyqty tirkeý rásimin elektrondy túrde júrgizgen. Bul tizimde Almaty qalasy 7-orynda, 13,49% paiyzdy qurap otyr», - deidi «Azamattarǵa arnalǵan úkimet» Almaty qalasy boiynsha filialynyń PR-menedjeri Jańyl Ápetova.
Onyń aitýynsha, 2019 jyldyń maýsymynan bastap azamattardy turǵylyqty jeri boiynsha tirkeý qyzmetterin pilottyq rejimde «Azamattarǵa arnalǵan úkimet» memlekettik korporatsiiasynyń qyzmetkerleri júzege asyrady.
«Pilottyq joba almatylyqtarǵa birqatar artyqshylyqtar berdi. Atap aitar bolsaq, front-ofisterdiń jumys kestesine sáikes azamattardy tirkeý boiynsha qyzmet kórsetý, iaǵni túski úzilissiz saǵat 9.00-den 20.00-ge deiin, kóshi-qon politsiiasynyń derekter bazasynda tirkeýge múmkindigi bar qyzmetkerler sanyn arttyrý, tirkeý boiynsha qyzmetke kezekti qysqartý siiaqty úderisterdi qolǵa alýdyń arqasy», – dep atap ótti Jańyl Ápetova.
Búginde mekenjai tirkeýin jasatý úshin tirkeýge qoiýshy jáne tirkelýshi taraptyń ETsQ-sy bolýy tiis. Azamat egov.kz-ke tirkeletin mekenjai men jeke málimetterin jazsa, baspana iesi oǵan ruqsatty jeke kabinetine kelgen suraýdy maquldaý arqyly beredi.
