Almatylyqtar meditsinalyq saqtandyrý qoryna 50 mlrd teńge aýdardy.
Bul týraly «Áleýmettik meditsinalyq saqtandyrý qory» KEAQ Almaty qalalyq filialynyń direktory Nurlybek Qabdyqaparov aitty, dep habarlaidy QazAqparat.
Onyń aitýynsha, ótken jyldyń sońyna deiin meditsinalyq saqtandyrý qoryna 246 mlrd teńge jinaqtalǵan.
«Almaty qalasy jarnalardyń kólemi jaǵynan respýblika boiynsha kósh bastap tur – jinaqtalǵan somanyń besten bir bóligi ońtústik astanalyqtarǵa tiesili. Jalpy, saqtandyrý júiesi iske qosylǵan 2017 jyldyń 1 shildesinen 2019 jyldyń 31 jeltoqsanyna deiingi aralyqta Almaty qalasynan Qorǵa 50 mlrd teńgeden astam jarna aýdaryldy. Onyń 47,9 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymdary», - deidi filial direktory Nurlybek Qabdyqaparov.
Sondai-aq, jyl basynan beri ózin-ózi jumyspen qamtyǵan 5851 adam 20,6 mln teńge kóleminde biryńǵai jiyntyq tólem tólegen.
Esterińizge sala ketsek, biryńǵai jiyntyq tólem elimizde 2019 jyldyń 1 qańtarynan bastap engizilgen bolatyn. Jiyntyq tólemniń ishinde ózge áleýmettik tólemderge qosa saqtandyrý jarnasy da bar. Ol jalpy somanyń 40 paiyzyn quraidy.
BJT – respýblikalyq mańyzy bar qalalar úshin 1 ailyq eseptik kórsetkish (AEK) nemese 2651 teńge, aýyldyq jerler úshin – 0,5 AEK nemese 1326 teńge kóleminde belgilengen. Tólemniń bul túrin frilanserler, santehnikter, qurylysshylar, taksi júrgizýshileri t.b. tólei alady.
