Almatylyqtar Qazposhta bólimshelerindegi úlken kezekke shaǵymdandy, dep habarlaidy QazAqparat tilshisi.
Solardyń biri - «Nýrkent» shaǵyn aýdanynyń turǵyny Jazira Ydyrysova.
«Men - poshta qyzmetin jii qoldanatyn tutynýshylarynyń birimin. Eki aptada bir ret Nur-Sultan qalasyna qujat jiberýim kerek. Qashan kelsem de uzyn-sonar kezek. Ásirese, túski saǵat 11-den keiin hat pen sálemdeme jóneltý múmkin emes. Maǵan Alataý aýdanyna qarasty «Nurkent» shaǵyn aýdanyndaǵy № 38 poshta bólimshesi jaqyn. Sondyqtan osynda kelemin. Bir ǵana tereze jumys isteidi. Mamandar fizikalyq turǵyda qyzmet kórsetip úlgermeidi», - dep shaǵymdandy almatylyq Jazira Ydyrysova.
«Qazposhta» AQ baspasóz qyzmeti máselege qatysty túsinikteme berdi.
«Alataý aýdanyndaǵy № 38 bólimshede ádette kezek bolmaidy. Qazirgi tańda operatordyń eki orny bos tur. Zalda 4 adam jumys isteidi. Jalpy Almatyda filialdarda bos jumys oryndary bar. Onyń ústine kóptegen qyzmetkerler densaýlyǵyna bailanysty demalysqa shyqty», - dep habarlady Qazposhtanyń baspasóz qyzmeti.
Vedomstvo málimetinshe, qazir operatorlar, poshtashylar, kýrerler men inkassatorlar úshin bos jumys oryndary bar.
Aita keteiik, Almatyda «Qazposhta» AQ-nyń 67 bólimshesi bar, onda 670 qyzmetker jumys isteidi.
«Biylǵy jyldyń 1 aqpannan bastap «Qazposhta» AQ qyzmetkerleriniń jalaqysy 93,5%-ǵa ósti. Kompaniia poshtashylardyń, operatorlardyń, júrgizýshilerdiń, ekspeditorlardyń jáne basqa da óndiristik qyzmetkerlerdiń jalaqysyn indeksatsiialady», - dep atap ótti Qazposhta baspasóz qyzmeti.
