Almatylyqtar ózderiniń biznes-jobalaryn iske asyrýǵa 556, 6 myń teńgeden grant alady, dep habarlaidy QazAqparat.
Qalalyq jumyspen qamtý ortalyǵynyń direktory Diliara Imanqulova brifing barysynda atap ótkendei, memlekettik granttar jańa biznesti ashqan nemese jolǵa qoiýdy kózdegen tulǵalarǵa óteýsiz jáne qaitarymsyz negizde beriledi.
«Qalalyq basqarý qurylymdary karantin sharalary aiaqtalǵannan keiin jumyssyz qalǵan azamattardy qoldaýdyń birqatar jolyn ázirlep otyr. Máselen, halyqty jumyspen qamtý ortalyǵy arqyly jumysqa ornalastyrýdan bólek, bastapqy biznesti iske asyrýdy josparlap otyrǵan adamdarǵa óteýsiz jáne qaitarymsyz negizde memlekettik granttar berilmek. Ótken jyly mundai granttardy bizde 2867 adam aldy. Biyl 1705 adamǵa 200 AEK kóleminde qarajat bólindi (555,6 myń teńge, 1 AEK – 2778 tg). Sonyń ishinde 706 almatylyqa granttar osy aida beriledi»,– deidi Diliara Imanqulova.
Spikerdiń aitýynsha, «Eńbek» baǵdarlamasyna qatysýshylar memlekettik granttardy alýǵa úmitkerler bola alady.
«Bul tizimge tehnikalyq jáne kásiptik, orta bilimnen keiingi bilim berý, joǵary nemese joǵary oqý ornynan keiingi bilim berý uiymdarynda, «Bastaý biznes» jobasy boiynsha kásipkerlik negizderine oqytý kýrstarynan ótkender ǵana engiziledi. Sonymen qatar, «Eńbek» baǵdarlamasynyń birinshi baǵyty sheńberinde oqýdy aiaqtaǵan jáne buryn basqa memlekettik baǵdarlamalar aiasynda granttar almaǵan tulǵalar, sondai-aq qonys aýdarýshylar, ataýly áleýmettik kómek alýshylar,kópbalaly otbasylar qatysa alady. Jańa biznes-ideialardy iske asyrýǵa memlekettik granttar 200 eselengen ailyq eseptik kórsetkishke deiingi mólsherde beriledi. Az qamtylǵan jáne kópbalaly otbasylarǵa,eńbekke jaramdy múgedekter men jastarǵa memlekettik granttardy alýǵa basymdyq beriledi»,– dedi D.Imanqulova.
Sonymen qatar ol kásipkerlik bastamalardy qoldaýǵa arnalǵan baǵdarlamaǵa qatysýshylar 8 myń AEK kóleminde shaǵyn nesie ala alatynyn tilge tiek etti.
«Bul 21 mln teńgeden astam qarajat degen sóz. Biyl osyndai 140 jobaǵa aqsha bólindi. Alǵashqy úmitkerler búginge deiin 14 shaǵyn nesieni alyp úlgerdi», – dep qortyndylady Almaty qalasy halyqty jumyspen qamtý ortalyǵynyń direktory.
