Sýret: examen.ru
Kólik politseileri sheteldik azamatty Almaty áýejaiynan qonaqúige deiin 45 myń teńgege jetkizgen taksi júrgizýshisin anyqtady, – dep habarlaidy Polisia.kz.
"18 sáýirde Almaty qalasy áýejaiyndaǵy jelilik politsiia bólimine Lufthansa áýekompaniiasynyń “Frankfýrt – Almaty” baǵytyndaǵy reisimen kelgen 43 jastaǵy Germaniia azamaty shaǵymdandy. Ol ózin áýejaidan qonaqúige qasaqana joǵary baǵamen, iaǵni 45 myń teńgege jetkizgen taksi júrgizýshisine qatysty shara qoldanýdy suraǵan.
Kólik politseileri jedel-izdestirý is-sharalaryn júrgizý barysynda Almaty qalasynyń 45 jastaǵy turǵynyn, jeke taksi júrgizýshisin anyqtady. Er adam germaniialyq azamatqa qoǵamdyq oryndarda tiisip, arbap, oǵan taksi qyzmetin usynyp, Almaty qalasynyń halyqaralyq áýejaiynan qaladaǵy Qonaev kóshesinde ornalasqan qonaqúige aparǵany úshin joǵary tólem alǵan. Taksi júrgizýshisi keltirgen shyǵyndy ótedi.
Quqyqbuzýshy QR ÁQBtK-niń 449-babynyń 1-bóligi (Qoǵamdyq oryndarda tiisý) boiynsha ákimshilik jaýapkershilikke tartyldy" - delingen habarlamada.
Germaniialyq azamat kólik politseilerine joǵary kásibilik tanytqandary jáne qarajatyn keri qaitaryp alýǵa úles qosqandary úshin alǵysyn aitqan.
Eske sala keteiik, aǵymdaǵy jyldyń basynan beri elimizdiń áýe jáne temirjol kóligi nysandarynda túrli ákimshilik quqyq buzýshylyqtar úshin 15 970 azamat jaýapqa tartylǵan. Onyń ishinde qoǵamdyq oryndarda tiiskeni úshin 880 azamat anyqtalǵan. Onyń 243-i – zańsyz taksi júrgizýshileri.
