Kólik politsiiasy italiialyq azamatshadan qonaqúige jetkizgeni úshin 45 myń teńge alǵan almatylyq taksistiń kim ekenin anyqtady, dep habarlaidy QazAqparat.
Kóliktegi politsiia departamentiniń málimetinshe, Italiiadan kelgen azamatsha Almaty áýejaiynan qonaqúige jetkizgeni úshin taksiske 45 myń teńge tólegen.
Departament bastyǵynyń birinshi orynbasary Madiiar Aitýǵanovtyń aitýyna qaraǵanda, qala turǵynynan shetel azamatyn asa qymbat baǵamen jetkizip tastaǵan júrgizýshige shara qoldaný kerektigi týraly ótinish túsken.
Kóp ótpei jedel izdestirý sharalary nátije berip, jeke taksi qyzmetin kórsetip júrgen adamnyń kim ekeni anyqtalǵan.
«Bul Almaty oblysynyń 48 jastaǵy turǵyny bolyp shyqty. Er adam áýejaidan Bógenbai batyr kóshesindegi qonaqúige deiin tym joǵary baǵa aityp, sheteldik azamatshany jańylystyrǵan. Quqyq buzýshyǵa Ákimshilik quqyq buzý týraly kodekstiń 449-baby 1-bóligi boiynsha shara qoldanyldy», - deidi Madiiar Aitýǵanov.
Al Qaraǵandy qalasynda 53 jastaǵy er adamnyń temirjol biletin satyp, bileti joqtardy poiyzǵa mingizip, deldaldyq jasaǵany anyqtaldy.
«Ol buǵan deiin de osyndai qylmysy úshin jaýapqa tartylǵan bolyp shyqty. Ákimshilik quqyq buzý týraly kodekstiń 449-baby 2-bóligi boiynsha 10 ailyq eseptik kórsetkish (31 800 teńge –red.) kóleminde aiyppul salyndy. Jyl basynan beri Kóliktegi politsiia departamentiniń mamandary túrli deńgeide zań buzǵan 25 746 azamatty jaýapqa tartty», - dep jazylǵan departamenttiń dereginde.
