QR Mádeniet jáne sport ministrligine qarasty Almatydaǵy bes óner ujymy gýmanitarlyq kómektiń alǵashqy legin jiberdi, dep habarlaidy QazAqparat.
«Arys qalasyndaǵy oqiǵa búkil qazaqstandyqtardyń qaiǵysy. Bul jaǵdaiǵa mádeniet salasynyń qyzmetkerleri de, bei-jai qarai almady. Búgin Almaty qalasyndaǵy 5 mádeniet oshaqtarynyń direktorlary men qyzmetkerleri Arysqa jolǵa shyǵyp baramyz. Biz olarǵa rýhani jáne materialdyq turǵydan kómektesýge ázirmiz» - deidi Qurmanǵazy atyndaǵy Qazaq ulttyq konservatoriiasynyń rektory Arman Júdebaev.
Bul Almatylyq óner ujymdarynyń eki kúnde jinaǵan gýmanitarlyq kómegi. Ol áli de jalǵasýda. Eki jerde kómek qabyldaý pýnkti ashyldy. Ol konservatoriia men óner akademisynyń ǵimaratynda ornalasqan.
«Arystaǵy baýyrlarymyzǵa qoldaý qajet. M. Áýezov atyndaǵy Qazaq memlekettik akademiialyq drama teatry da, bul aýyrtpashylyqty bólisýge ázir. Teatrymyzdyń aqsaqaldary Asanáli Áshimov, Sábit Orazbaev, Esmuqan Obaev siiaqty ataqty ártistermen qatar barlyq qyzmetkerler ózderiniń bir kúndik jalaqylaryn aýdardy. Sonymen qatar, qosymsha qarajat jinap, er azamatarǵa, áielderge, balalarǵa kiimder satyp aldyq» - dedi atalǵan teatr direktory Sábit Ábdihalyqov.
