Almaty qalasyndaǵy bilim ordalarynda oqýshylar men muǵalimderge arnalǵan elektrondy platforma jasalyp jatyr. Bul týraly Almaty qalalyq bilim berýdegi jańa tehnologiialar ǵylymi-ádistemelik ortalyǵynyń direktory Andrei Dýpik málim etti.
Elektrondy platforma mektep oqýshylaryna innovatsiialyq ideialar men jobalar júzege asyrýǵa kómektesip, olardyń tsifrlyq daǵdylardy meńgerýine yqpal etpek.
«Óńirdegi jalpy bilim beretin mektepter bazasynda fakýltativter ashylady. Biz onda suranysqa sai keletin baǵyttardy qamtityn bolamyz. Atap aitqanda, 3D modeldeý, robotehnika, veb-saittar, oiyndar, mobildi qosymshalar jáne t.b. boiynsha bilim berilip, jasalý joldary úiretiledi. Munyń bárin bir jerde, iaǵni elektrondy platforma bazasynda jinaqtaityn bolamyz. Bul oqýshyǵa da, oqytýshyǵa da koljetimdi. Máselen, bilim alýshy saitqa kirip, naqty taqyrypty tańdai otyryp, beine-rolikter men kontentti kóre alady, sondai-aq testileýden ótýge de múmkindik jasalǵan. Elektrondy platformany kez kelgen ýaqytta muǵalim men oqýshy úide otyryp-aq paidalana alady», – deidi Almaty qalalyq bilim berýdegi jańa tehnologiialar ǵylymi-ádistemelik ortalyǵynyń direktory.
Qazirgi tańda tsifrlyq platformany qurý jumystary júrip jatyr. Josparǵa sáikes alǵashqy kezeńde aimaqtaǵy 102 mektep (50 paiyz) qamtylady.
Osylaisha, osy jyldyń qyrkúiek aiynda pilottyq joba retinde iske qosylady. Qatysýshy mektepter úshin tehnika, programma, kontent beriletin bolady.
Aita ketsek, «Tsifrlyq Qazaqstan» memlekettik baǵdarlamasy aiasynda el aýmaǵyndaǵy barlyq bilim ordalary 100 paiyz Wi-Fi jelisimen, kompiýter qurylǵylarymen qamtamasyz etiledi. Sonymen qatar, myńdaǵan IT-synyptar men úiirmeler (innovatsiia men tehnologiia tilin úiretetin) ashylatyn bolady. Munyń barlyǵy elimizdiń IT-salasynyń áleýetin kóterýge baǵyttalyp otyr.
