Foto: QR OAM
Almaty qalasyndaǵy №79 gimnaziianyń 11-synyp oqýshysy Dana Qadyrbek jahandyq sý tapshylyǵy máselesin sheshýdiń jolyn tapty, dep habarlaidy Ult.kz.
Oqýshy sońǵy eki jylda qazaqstandyq bilim berý salasynyń álemdik arenadaǵy naǵyz elshisine ainaldy. Onyń jobalary mektep baǵdarlamasynyń sheńberinen shyǵyp, halyqaralyq uiymdardyń qyzyǵýshylyǵyn týdyryp otyr.
2024-2025 jyldary Dana Qadyrbek Kazakhstan Smart Space atty ǵaryshtyq tehnologiialar boiynsha halyqaralyq konkýrstarda júldeli oryndarǵa ie bolyp, injeneriia salasyndaǵy tereń bilimin dáleldedi. Budan keiin AQSh-taǵy Olympiad USA matematikalyq olimpiadasynda 2-oryndy ielenip, Indoneziiada ótken YISF konkýrsynda jeńiske jetti. Alaida onyń naǵyz jetistikteri aýadan sý alý tehnologiiasyna den qoiǵan kezde bastaldy.
2025 jyldyń shildesinde Seýlde ótken WICO dúniejúzilik jastar ǵylymi olimpiadasynda Dana altyn medal aldy. Qazylar alqasyn oqýshynyń «Atmosferadan sý jinaýǵa arnalǵan aliýminii fýmaraty negizindegi metall-organikalyq qańqaly qurylymdardyń sintezi» atty taqyryby tańǵaldyrdy. Qarapaiym tilmen aitqanda, bul qurylǵy tipti qýańshylyq jaǵdaida aýyz sý óndire alady.
2026 jyldyń sáýir aiynda Venadaǵy BUU shtab-páterinde UNIDO uiymdastyrǵan Cleantech Days Forum 2026 sharasynda Dana Qadyrbek álemdegi eń úzdik 3 jas ónertapqyshtyń qataryna kirdi.
