Almaty qalasynyń ákimdiginde ekonomikanyń asa zardap shekken sektorlaryn qoldaýdyń qosymsha sharalary týraly aityldy, dep habarlaidy "Ult aqparat".
Qazaqstan Respýblikasy Úkimetiniń 2021 jylǵy 17 sáýirdegi qaýlysymen 2021 jyldyń sońyna deiin ekonomikalyq ósýdi qalpyna keltirý jónindegi Keshendi josparǵa tolyqtyrýlar engizildi. Negizgi tolyqtyrýlardyń arasynda – shaǵyn jáne orta biznes sýbektilerin aitarlyqtai qoldaýdy kózdeitin sharalar bar.
Almaty qalasynyń ákimdigi uzaq ýaqyt ishinde ortalyq memlekettik organdarmen koronavirýs infektsiiasynyń taralýyna jol bermeý boiynsha qoiylǵan shekteý is-sharalarynyń sheńberinde biznes sýbektilerine qoldaý sharalaryn kórsetý boiynsha kelissózder júrgizdi.
Kelissózder júrgizý qorytyndysy boiynsha ekonomika salasynda zardap shekken shaǵyn jáne orta biznes sýbektileriniń ekonomikalyq qyzmet túrleriniń tizbesi 346 ekonomikalyq qyzmet túrleriniń jalpy jikteýishine (EQJJ) deiin keńeitildi. Osylaisha, atalǵan ekonomikalyq qyzmet túrlerine jatatyn biznes sýbektileri nesieleri boiynsha tólemderdiń merzimin keiinge qaldyrýǵa úmit arta alady.
Tártip kásipkerlik maqsattar úshin kishi, shaǵyn jáne orta biznes, sondai-aq jeke kásipkerlerdiń ókilderine 2021 jylǵy 1 sáýirge deiin berilgen banktik qaryzdar men kishi nesieler boiynsha tólemderdiń merzimin keiinge qaldyrýdy kózdeidi.
Tólemderdi keiinge qaldyrý merzimi qaryz alýshynyń óziniń tańdaýy boiynsha 30 kúnnen 90 kúnge deiingi merzimdi quraidy. Tólemderdi keiinge qaldyrý úshin qaryz alýshylar óz bankine nemese mikroqarjylyq uiymǵa 2021 jylǵy 30 maýsymǵa deiingi merzimde ótinish jasaýy tiis. Budan buryn engizilgen salalardan (óńdeý ónerkásibi, aqparat, kólik, qoimalaý) basqa ekonomikanyń zardap shekken salalarynyń tizbesine kórkemóner, oiyn-saýyq jáne demalys, kóterme jáne bólshek saýda, ómir súrý jáne tamaqtaný boiynsha qyzmetter usyný, sondai-aq birqatar basqa da baǵyttar kiredi.
Budan basqa, 2021 jylǵy 30 maýsymǵa deiin shaǵyn jáne orta biznes sýbektileri úshin memlekettik jáne memlekettik syńaily uiymdardyń menshik ieleriniń jyljymaityn múlik nysandary boiynsha olardyń jalǵa alý tólemderin esepteý kidirtiletin bolady.
Almatyda 2020 jyly karantin rejimi kezeńinde shaǵyn jáne orta biznestiń 75 myń sýbektisi somasy 23,5 mlrd teńgeni quraityn salyq jeńildikterin paidalanǵanyn esterińizge salamyz.
Nesieler boiynsha somasy 127,3 mlrd teńgeni quraityn 360 myń qaryz qarajattarynyń tólemderi, onyń ishinde, shaǵyn jáne orta kásipkerliktiń somasy 72 mlrd teńgeni quraityn 2889 qaryz qarajattarynyń tólemderi (16 naýryzdan 15 maýsymdy qosa alǵanda, somasy 40 mlrd teńgeni quraityn 1588 qaryz qarajattarynyń tólemderi; 16 maýsymnan 24 tamyzdy qosa alǵanda, somasy 32 mlrd teńgeni quraityn 1301 qaryz qarajattarynyń tólemderi) keiinge qaldyryldy. Somasy 376 mln teńgeni quraityn turǵyn jaidy jalǵa alý tóleminen 1,1 myń kásipker bosatyldy.
