Jedel shuǵyl kómek kórsetý aýrýhanasynyń dárigerleri 102 jastaǵy keiýanaǵa ota jasady, dep habarlaidy "Ult aqparat".
Almaty qalalyq Qoǵamdyq densaýlyq saqtaý basqarmasynyń málimetinshe, 102 jastaǵy Anna Shestopalova san súiegi synyp, aýrýhanaǵa túsken. Keiýananyń jasyna qaramastan, travmatologtar oǵan ota jasaý týraly sheshim qabyldady.
«Biz alǵash ret jasy 100-den asqan naýqasqa ota jasadyq. Osydan birneshe jyl buryn 96 jastaǵy zeinetkerge ota jasaǵan edik, qazir ol 103 jasta ári densaýlyǵy jaqsy. Anna apamyz da jaqyndaryn qýantady dep úmittenemiz. Naýqastyń kóńil-kúii jaqsy. Ota sátti ótti», - deidi travmatologiia bóliminiń meńgerýshisi Vladimir Semionov.
Dárigerler jasy kelgen úlken kislerge ota jasaý qaýipti ári kúrdeli ekenin aitady.
«Ádette mundai otalar naýqastyń jasyna bailanysty qiyn jasalady. Biz operatsiia jasamas buryn naýqasty daiyndap, onyń ruqsatyn aldyq. Bári oidaǵydai ótti. Ota 35 minýtqa sozyldy»,– deidi travmatolog Ahmed Davreshov
Anna Shestopalova ómir boiy bastaýysh mektepte muǵalim bolyp jumys istegen. Búginde onyń úsh qyzynan taraǵan bes nemeresi jáne jeti shóberesi bar.
Eki ǵasyrdyń kýási bolǵan keiýana, uzaq ómir súrýiniń sebebin aitty.
«Meniń uzaq ómir súrýimniń sebebi árdaiym meiirimdi bolýǵa tyrystym, eshqandai adammen janjaldaspai, barlyǵyna tek jaqsylyq tiledim, bárin jaqsy kórdim, durys tamaqtanyp, taza aýada kóbirek ýaqyt ótkizdim. Salaýatty ómir saltyn ustandym. Men ota jasatýdan qoryqpadym, - deidi keiýana
Jalpy alǵanda, Almaty qalalyq jedel shuǵyl kómek kórsetý aýrýhanasynyń travmatologiia bólimshesinde jylyna ár túrli 1500-ǵa jýyq ota jasalady, dárigerler karantin kezeńinde kúrdeli qorǵanys sharalaryna qaramastan ota jasaýdy jalǵastyrdy.
