Almaty ákimi Baqytjan Saǵyntaev «Almaty» telearnasyndaǵy tikelei efir kezinde Almatyǵa omikron shtamynyń keletinin aitty, dep habarlaidy QazAqparat.
Tikelei efir barysynda qala ákimi almatylyqtarǵa jedel túrde vaktsina alǵan jón ekenin aitty.
«Qazirgi kezde bizde vaktsinanyń mólsheri jetkilikti. Birinshi jáne ekinshi vaktsina úshin de, revaktsinalaý úshin de jetkilikti mólsheri bar. Sondyqtan almatylyqtardyń vaktsinalanýǵa jedel barǵany durys. Sebebi omikron shtamy kelgen kezde jaǵdai qiyndai túsedi, al omikronnyń keletini sózsiz», - dedi Baqytjan Saǵyntaev.
Sondai-aq, qala ákimi eger karantin talaptary qaita kúsheietin bolsa, oǵan daiyndyq barysy qalai ekenin túsindirdi.
«Biz búgin ózimizdiń dárilik zattar men jeke qorǵanys quraldary boiynsha daiyndyǵymyzdy taǵy qarap, pysyqtap shyqtyq. Eger karantin talaptary qaita kúsheitilse, oǵan daiyn bolý úshin qosymsha qarajatty rezervte saqtap otyrmyz, dári-dármek pen jeke qorǵanys quraldary jetkilikti mólsherde bolý úshin farmatsevtikalyq kompaniialarymyzǵa qosymsha tapsyrys berip qoidyq. Sondai-aq, jabdyqtarmen de tolyq kólemde qamtamasyz etilgenbiz», - dep atap ótti Almaty ákimi.
