Sáýir aiynda Almatyǵa qazaqstandyq QazCOVID-in vaktsinasynyń 6000 dozasyn, sondai-aq «Spýtnik V» vaktsinasynyń 65 000 dozasyn jetkizý josparlanyp otyr. Múmkin qytailyq vaktsina jetkiziletin shyǵar. Bul týraly onlain brifing barysynda qalanyń bas memlekettik sanitar dárigeri Jandarbek Bekshin men qalalyq qoǵamdyq densaýlyq saqtaý basqarmasynyń bastyǵy Nariman Tabynbaev málim etti, dep habarlaidy "Ult aqparat".
Almatynyń bas memlekettik sanitar dárigeri men densaýlyq saqtaý basqarmasynyń basshysy sáýir aiynda qalada jappai vaktsinatsiialaý bastalatynyn aitty.
«Almatyda sáýirde jappai vaktsinatsiia bastalady. Vaktsinatsiia pýnktterin 250 jerde ornalastyrý josparlanyp otyr. Negizinen memlekettik emhanalar, jeke qurylymdaǵy meditsinalyq mekemeler qamtylǵan. Biraq saýda ortalyqtaryn da tartýǵa bolady. Kelissózder júrgizilip, jumys toby quryldy. Densaýlyq saqtaý ministri Aleksei Tsoidyń málimdemesine súiensek, Almatyǵa 65 000-nan asa «Spýtnik V» vaktsinasyn ákelý josparlanǵan», - dedi Nariman Tabynbaev.
Jandarbek Bekshin qazaqstandyq KazCOVID-in vaktsinasynyń alty myń dozasyn jetkizý sáýir aiyna josparlanyp otyr dedi.
Óz kezeginde, qalalyq qoǵamdyq densaýlyq saqtaý basqarmasynyń basshysy Almatydaǵy jeke meditsinalyq ortalyqta reseilik vaktsinany aqyly túrde egý usynylady degen aqparatty joqqa shyǵardy.
«Vaktsinatsiia máselesi densaýlyq saqtaý ministrliginiń baqylaýynda. Barlyq vaktsinalar arnaiy organmen «SK-Farmatsiia» JShS arqyly óńirlerge taratylady. Almatyda «SK-Farmatsiia» JShS qyzmetkerleri preparatty qalalyq vaktsinalar qoimasyna jeke aparyp tapsyrady. 17 750 doza arnaiy qurylǵan komissiianyń sheshimimen bólindi. Almatyǵa basqa vaktsinalardyń jetkizilgeni týraly týraly málimet joq», - dedi ol.
Spikerlerdiń aitýynsha, jappai vaktsinatsiia adamnyń qai jerdegi aýrýhanaǵa tirkelgenine qaramastan tegin júrgiziletinin jetkizdi.
