Almatynyń halyqaralyq áýejaiyna erekshe alyp An-22 «Antei» ushaǵy qondy, dep habarlaidy "Ult aqparat".
Áýejai baspasóz qyzmetiniń habarlaýynsha, bort janarmai quiý úshin qonaǵan. Qazir ol qaitadan ushyp ketti. Qai baǵytta ekendigi habarlanbaidy.
An-22 «Antei» - bul SSSR-dyń aýyr týrbovintti kóliktik ushaǵy. Odaqtyń birinshi keńfiýzeliajdy borty. Jalpy, osyndai 69 ushaq shyǵarylǵan. Búgingi tańda ony Resei áskeri-áýe kúshteri men Ýkrainanyń «Antonov Airlines» áýe kompaniiasy qoldanady.
Alǵash ret áýege 1965 jyldyń 27 aqpanynda kóterildi. Alyp An-22 áskeri kólik ushaǵyna grek mifologiiasyndaǵy Anteianyń aty berilgen.
Buǵan deiin, Almaty áýejaiyna birneshe ret álemdegi eń úlken An-225 «Mriia» ushaǵy qonǵan bolatyn.
