Foto: QR TJM baspasóz qyzmeti
Tótenshe jaǵdailar ministri, general-maior Syrym Sháriphanov TJM apparattyq keńesinde seismikalyq qubylystarǵa daiyndyq, olarǵa den qoiý boiynsha TJM qurylymdyq jáne aýmaqtyq bólimsheleriniń jumysyndaǵy olqylyqtardy synady, dep habarlaidy "Ult aqparat" vedomstvonyń baspasóz qyzmetine silteme jasap.
"Ol vedomstvolyq baǵynysty uiymdardyń osy baǵyttaǵy jetkiliksiz oryndaýshylyǵy men álsiz jumysyn da atap ótti.
Atap aitqanda, TJM basshysynyń shaǵymdary azamattardy habardar etý, aqparattandyrý jáne oqytý jónindegi qyzmetke qatysty boldy" - delingen habarlamada.
Ministr osy baǵyttarda júieli sharalar qabyldaýdyń mańyzdylyǵyn eskertti. Ol jer silkinisi kezindegi is-qimyldardy túsindirý boiynsha halyqpen jumysty kúsheitýdi, sonymen qatar elimizdiń barlyq óńirinde bar habarlandyrý júiesin iske qosý algoritmin jetildirýdi tapsyrdy.
«Azamattardy seismikalyq jattyǵýlarǵa tartýdyń jańa sharalaryn taldap, qoldaný kerek. Oqytý sabaqtyń jańa ádisteri men ádisterin qoldana otyryp, shynaiy jaǵdaiǵa jaqyn júrgizilýi kerek. Eskertý men oqytý sapaly ári maqsatty bolýy kerek», - dedi Syrym Sháriphanov.
Sonymen qatar, ministr Ulttyq iadrolyq ortalyq, Qazaq bas sáýlet-qurylys akademiiasy, Ǵylym jáne joǵary bilim ministrliginiń qyzmetkerleriniń qatysýymen TJM Seismologiialyq baiqaý jáne zertteýler ulttyq ǵylymi ortalyǵynyń bazasynda seismikalyq qubylystardy boljaý jónindegi vedomstvoaralyq komissiia qurýdy tapsyrdy.
"Budan basqa, yqtimal seismikalyq qubylystar aimaǵyndaǵy jumysty eskere otyryp, barlyq qutqarý bólimshesiniń is-qimyl algoritmin pysyqtaý tapsyryldy.
Tapsyrmalardyń oryndalýy qatań baqylaýǵa alyndy" - delingen habarlamada.
