2020 jyldyń ekinshi toqsanynda Almaty qalasynyń Alataý aýdanynyń indýstriialyq aimaǵynda «Úlken diametrli dánekerlengen bolat qubyrlaryn shyǵaratyn zaýyt qurylysy» jobasyn iske qosý josparlanyp otyr, dep habarlaidy "Ult aqparat" QR Indýstriia jáne infraqurylymdyq damý ministrliginiń baspasóz qyzmetine silteme jasap.
Qurylys alańynyń jalpy aýmaǵy- 18,3 gektar. Joǵary tehnologiialyq zaýyt qurylysy Qazaqstanǵa ákelinetin qubyr ónimderiniń 70% importyn almastyrýǵa múmkindik beredi.
Jobany júzege asyrý úshin «Asia Steel Pipe Corporation» Qazaqstan-Qytai birlesken kásiporny quryldy. Investitsiianyń jalpy somasy 33 mlrd teńgeden asady. Atalmysh joba 2015-2019 jyldarǵa arnalǵan respýblikalyq indýstriialandyrý kartasyna engizilgen. Sondai-aq «Bir beldeý, bir jol» baǵdarlamasy aiasynda QHR men QR arasyndaǵy negizgi jobalar tizimine kiredi.
Aita ketý kerek, qubyr zaýyty ornalasatyn jer retinde Almaty qalasy logistika jáne bolat oramynyń negizgi jetkizýshisi – Batys Qytaidaǵy metallýrgiialyq zaýyttarǵa jaqyn bolǵany úshin tańdap alynǵan.
Otandyq zaýyt jyl saiyn 100 myń tonnaǵa deiin joǵary sapaly qubyr ónimderin shyǵarady dep josparlanýda. Aldaǵy ýaqytta óndiristi 150 myń tonnaǵa deiin keńeitý kózdelip otyr. Birinshi jeli spiraldy qubyrlar shyǵarady. Keiin úlken diametrli tik jikti qubyrlar jelisin iske qosý kózdelgen.
Zaýytta diametri 355 mm-den 1420 mm-ge deiin, uzyndyǵy 8 m-den 12,5 m-ge deiin qubyr ónimderin shyǵarý kózdelgen. Qubyrlardy óndirý kezinde beriktigi joǵary X80, H100 sanatyndaǵy bolat qoldanylady. Al qubyr qabyrǵasynyń qalyńdyǵy 6,4 mm-den 25,4 mm-ge deiin bolady.
Bul dánekerlenetin qubyrlar munaidy, gazdy, sýdy jáne munai ónimderin tasymaldaýǵa, sondai-aq taý-ken, qurylys, himiialyq ónerkásip, energetika salalarynda paidalanýǵa arnalǵan. Osylaisha jańa zaýyt ishki naryq pen taiaý shet elderdi sapaly qubyr ónimderimen qamtamasyz etýge múmkindik beredi. Sonymen qatar, kásiporynda 300-den astam turaqty jumys orny qurylady.
Dánekerlengen bolat qubyrlaryn shyǵaratyn zaýyt jobasyn júzege asyrý QR Tuńǵysh Prezidenti – Elbasy Nursultan Nazarbaev pen QHR Tóraǵasy Si Tszinpinniń 2014 jylǵy kezdesýiniń qorytyndysy boiynsha múmkin boldy. Sol kezdesýde «QazMunaiGaz»UK« AQ men CNPC arasynda munai-gaz salasyndaǵy keshendi strategiialyq yntymaqtastyq baǵdarlamasyna qol qoiyldy.
