Almaty ákimdigi taý bókterindegi qurylys nysanyn jospardan tys tekserý týraly habarlady, - dep habarlaidy Tengrinews.kz.
Áńgime Kók Tóbe irgesinde ornalasqan Kólsai yqshamaýdanyndaǵy qurylys týraly bolyp otyr. Jergilikti turǵyndardyń aitýynsha, 2022 jyldyń basynda 1,7 gektar jerdiń iesi aýysqan. Jerdiń jańa qojaiyny 200-ge jýyq aǵashty kesip, jerdi tegistei bastaǵan.
"Onyń ústine, ol jerde shaǵyn bulaq bolǵan, sýy kishigirim toǵanǵa quiatyn. Olar qubyr tartyp, bulaqty kómip, toǵan tartylyp qaldy.
Biraq bolashaqta odan da aýyr zardaptar bolýy múmkin. Óitkeni, osy jerge turǵyn úi kesheni men kottedjder salǵysy keledi. Ýaqyt óte kele bulaq sý qaita shyǵady, sodan keiin úilerdiń irgetasy búlinedi. Alaida munymen eshkim ainalysqysy kelmeidi, árkim óz paidasyn oilaidy", - deidi jergilikti turǵyndardyń múddesin qorǵaityn zańger Ǵabit Ómirbekov.
Quqyq qorǵaýshy jazdyń basynda turǵyndar atynan ákimdikke úndeý jazǵanyn atap ótti. Biraz ýaqyttan keiin ol osy qaǵazdyń kóshirmesin alyp, sheneýnikterge máseleni taǵy da eske salǵan. Sonymen qatar, jaz ortasynda Kólsai yqshamaýdanynyń turǵyndary jýrnalisterge telefon soǵyp, respýblikalyq telearnalarǵa jaǵdaiyn aitqan.
"Bári bir-birine úndeýimizdi jiberip jatyr. Aǵashtardy zańsyz kesý týraly aryzdy qabyldaý úshin keltirilgen shyǵyn kólemin, iaǵni kesilgen jasyl alqaptardyń sanyn esepteý kerek. Al bul - Jasyl ekonomika departamentiniń mindeti. Jalpy, 200-ge jýyq aǵashty joiǵan ýchaske iesin jaýapqa tarta almaimyz.
Onyń ústine, jer iesine qurylysty jalǵastyrýǵa eshkim tyiym sala almaidy. Osy ýaqytta ol aýmaqty belsendi túrde damytýdy jalǵastyryp jatyr. Qazir aýmaqty tegisteý jumystary júrgizilip jatyr. Munyń bári jergilikti turǵyndar pikirimen sanaspastan jasalyp jatyr. Óitkeni, olardyń úileri jaqyn jerde ornalasqan. Al bolashaqta jańa úilerge júk kóbeiip, basqa úilerge ziian tigizýi múmkin", - dep tolyqtyrdy zańger.
Bul rette Almaty qalasynyń qala qurylysyn baqylaý departamenti jospardan tys tekserý júrgizetinin habarlady.
"Ákimshilik jer teliminiń iesine qatysty jospardan tys tekserý júrgizedi, onyń qorytyndysy týraly qosymsha habarlanady", - dedi vedomstvo ókilderi.
