Almatydaǵy Seifýllin dańǵylynda táýlik boiy reid sharalary ótkiziledi. Kóshe boiynda jeńil júristi qyzdardy politsiia anyqtap, tiisti sharalar qoldanýda, dep habarlaidy QazAqparat.
«Almaty qalasy ákiminiń tapsyrmasy boiynsha Seifýllin dańǵylynda intimdik qyzmet kórsetetin jeke tulǵalardy jáne jezóksheler ordasyn anyqtaý boiynsha reidtik sharalar turaqty túrde júrgizilýde. Osy kezeńde ishki ister organdaryna 1 200 -den astam jeńil júristi qyz-kelinshekter jetkizildi. Sonymen qatar, joǵaryda atalǵan áielderdi tasymaldaýmen ainalysatyn 205 adam jáne 87 taksi júrgizýshisi anyqtaldy. Politsiiaǵa jetkizilgen árbir adamǵa qatysty arnaiy tekserý júrgiziledi: olardyń jeke basyn anyqtaimyz, basqa qylmystarǵa qatysy bar-joǵyn tekseremiz, saýsaq izin alamyz. Sodan keiin ákimshilik jáne qylmystyq zańnamaǵa sáikes shara qoldanamyz», - dedi Almaty qalalyq PD Túrksib aýdandyq politsiia basqarmasynyń bastyǵy Erkin Amantaev.
Sondai-aq, profilaktikalyq sharaǵa SPID ortalyǵynyń qyzmetkerleri de jumyldyryldy. Meditsina qyzmetkerleriniń jumys isteýine politsiia jaǵdai jasady. Olar basqarmada arnaiy zerthana kabinetin uiymdastyrdy. Onda jeńil júristi qyzdar jynystyq jolmen beriletin aýrýlarǵa test tapsyrdy.
Almaty politsiiasynyń jumysyna Seifýllin kóshesiniń turǵyndary oń baǵa berdi.
«Politsiia qyzmetkerleri táýlik boiy jumys isteidi. Qazir bári jaqsaryp keledi. Burynǵydai jol boiynda turatyn qyzdar joq. Bir ai boldy, kóshe tym-tyrys. Tóbeles, aiqai-shýdan qutyldyq», - deidi Seifýllin dańǵyly boiynda ornalasqan azyq-túlik dúkeniniń iesi Gúlsim Baimahambetova.
«Men Seifýllin kóshesinde ornalasqan kópqabatty úide 1961 jyldan beri turamyn. Osydan 20 jyl buryn bizdiń kóshe Almatynyń eń qorqynyshty kóshesi bolatyn. Túngi kórinisin aitýǵa aýzym barmaidy. Jartylai jalańash qyzdar trotýarda otyrdy, ótý múmkin bolmady. Qazir bári ózgerdi. Jeńil júristi qyzdardy nemese maskúnemderdi kórsek boldy, dereý politsiiaǵa habarlasamyz, olar kelip shara qoldanady. Tártip kúsheie tústi, ýchaskelik politsiia qyzmetkerleri jaqsy jumys istep jatyr», - deidi jergilikti turǵyn Elizavetta Gýnbina.
