Almatydaǵy lai kóshkini júrgen jerden bir adam óli tabyldy, dep habarlaidy "Ult aqparat" Tótenshe jaǵdailar departamentine silteme jasap.
Almaty qalasy TJD jáne respýblikalyq jedel-qutqarý jasaǵynyń kúshterimen topyraqtyń sýlanýyna bailanysty tehnogendik sipattaǵy sý tasqyny saldarynan ǵimarattyń zaqymdalýynan aldyn ala aqparat boiynsha qaza tapqan er adamnyń denesi tabyldy.
"Saǵat 10:00-degi jaǵdai boiynsha aqparatqa sáikes, Almatyda júzý jiyny ótetin jerde jedel shtab ashyldy. Qazirgi ýaqytta jeke turǵyn úidi balshyq massasynan tazartý jáne adamdardy izdeý jumystary júrgizilýde. 182 maman men 32 tehnika jumyldyryldy. Jedel meditsinalyq járdem brigadalary jumys isteýde. Týystary men kórshilerine shuǵyl psihologiialyq kómek kórsetildi", - delingen habarda.
Izdeý-qutqarý jumystary jalǵasýda.
Eske salaiyq, búgin, 8 aqpanda saǵat 02.20-da Almaty qalasy Medeý aýdanynyń "Taý-Samal" shaǵyn aýdanynda aldyn ala aqparat boiynsha tehnogendik sipattaǵy topyraqtyń ylǵaldanýynan lai kóshkini túsken.
Aldyn ala aqparatqa sáikes, úilerde tórt adam, onyń ishinde eki bala bolǵan. Jaqyn mańdaǵy úilerdiń turǵyndary úshin №47 orta mektepte evakýatsiialyq pýnkt ashyldy. Sondai-aq Almaty ákimi Erbolat Dosaev lai kóshkinine bailanysty tehnogendik apat bolǵan jerge baryp, qiraǵan úilerdi aralady.
