Almaty ákimi Baqytjan Saǵyntaev qalany damytýǵa qatysty problemalyq máselelerdi talqylaý úshin qurylys kompaniialarynyń basshylarymen kezdesti, dep habarlaidy QazAqparat.
Byltyr Almatyda 2,1 mln sharshy metrge jýyq úi paidalanýǵa berilse, biyl shamamen 2,2 mln sharshy metr turǵyn úi nemese 19,5 myń páter salý josparlanǵan.
Onyń ishinde, 1553 myń sharshy metr kommertsiialyq qurylys nemese 16 029 páter, 593 myń sharshy metr jeke turǵyn úi nemese 2374 turǵyn úi. Memlekettik biýdjet esebinen 64,5 myń sharshy metr turǵyn úi nemese 1130 páter salý josparlanyp otyr.
Qala ákimi Baqytjan Saǵyntaev aitqandai tek Naýryzbai aýdanynyń ózinde ǵana shamamen 500 myń sharshy metr turǵyn úi paidalanýǵa berilgen.
«Osyǵan orai, qalanyń jol-kólik infraqurylymynyń júktemesi artyp keledi. Sondyqtan Abai dańǵylyn úńgileý jumystarynyń qarqynyn tómendetpeý kerek. Endi ekonom-klasty úilerge injenerlik kommýnikatsiialardy júrgizgen kezde páterlerdiń qoljetimdiligine mán beriletin bolady. Asa mańyzdy máseleniń biri - qalalyqtar sanynyń artýyna orai áleýmettik nysandarǵa túsetin júkteme kóbeidi. Qurylys kompaniialarynyń basshylary bul problemany birge sheshýge daiyn ekendikterin bildirdi. Keshendi qurylys barysynda mektepterge, bala baqshalarǵa, emhanalarǵa túsetin júktemeni aldyn ala boljap, áleýmettik nysandardy salýdyń tetikteri anyqtalatyn bolady. Bos alańdardyń tapshylyǵynan qurylys naryǵyna qatysýshylarmen birge «Eski úi» baǵdarlamasynyń mańyzy artady. Búgingi kúni qalada 1440 úi osy sanatqa jatady», - dedi Baqytjan Saǵyntaev.
Ákimmen kezdesýde salynatyn ár sharshy metrdiń qoljetimdiligi úshin qurylysty júrgizýshiler otandyq óndirýshilerden qurylys jáne árleý materialdaryn satyp alý kólemin ulǵaitýǵa daiyn ekendikterin málimdedi.
Sondyqtan B. Saǵyntaevtyń tapsyrmasy boiynsha Almatynyń Indýstrialdy aimaǵyndaǵy «Qarapaiym zattar ekonomikasy» baǵdarlamasy aiasyndaǵy jobalardy júzege asyrý jónindegi jumystar jandandyrylady.
Kezdesý barysynda qurylysty salýshylarǵa ákimdiktiń qalanyń tarihi ortalyǵynda jáne aýlalarda ornalasqan ýchaskelerde úi salýǵa tyiym salatyn pozitsiiasynyń esh ózgermeitini taǵy bir ret eskertildi.
«Qala ósip jatyr. Sondyqtan qurylys megapolistiń jetekshi draiveri bolyp qala beredi. Munda barlyq taraptardyń – ákimdiktiń, qurylysshylardyń jáne turǵyndardyń múddelerin qorǵaý mańyzdy. Buǵan ashyq dialog arqyly qol jetkizýge bolady. Ony turaqty júrgizetin bolamyz», — dedi B. Saǵyntaev.
