Biylǵy jyldyń bastapqy eki aiynda Almaty turǵyndaryna kórsetilgen meditsinalyq kómek sapasyn baqylaý barysynda 6,4 myń qyzmettiń túrli kemshilikpen kórsetilgeni anyqtaldy. Nátijesinde qaladaǵy emdeý mekemelerine 335 mln teńge aiyppul salyndy. Bul týraly «Áleýmettik meditsinalyq saqtandyrý qory» KEAQ Almaty filialy málim etti, dep habarlaidy "Ult aqparat".
Meditsinalyq qyzmet sapasyn baqylaý bólimi jetekshisi Ásem Manapbaevanyń aitýynsha, kemshiliktiń basym bóligine konsýltativtik-diagnostikalyq kómek kórsetetin klinikalar tarapynan jol berilgen. Jalpy, konsýltativtik-diagnostikalyq kómek boiynsha 4,5 myń qyzmet túrli kemshilikpen kórsetilgen. Nátijesinde 7,1 mln teńge qaitaryp alyndy.
«Aqaýmen kórsetilgen 1,5 myń qyzmet – statsionarlar men statsionardy almastyratyn kómek uiymdaryna tiesili. Atalǵan kemshilikter úshin atalǵan klinikalar 321,8 mln teńge aiyppul tóledi. Al, emhanalar 343 qyzmetti kemshilikpen kórsetken. Monitoring nátijesinde 6 mln teńge qorǵa qaitaryldy», - dedi Ásem Manapbaeva.
Kóptegen meditsinalyq uiymdar emdeý-diagnostika barysynda belgilengen standarttardan aýytqý, meditsinalyq qujattardy durys toltyrmaý, qyzmet baǵasyn negizsiz ósirý syndy olqylyqtarǵa oryn bergen. Sonymen qatar, kórsetildi dep jazylǵan belgili bir qyzmet túrleriniń shyn máninde kórsetilgenin rastai almaǵan emhanalar da bar.
«Áleýmettik meditsinalyq saqtandyrý qory kórsetilgen qyzmet sapasyna turaqty baqylaý júrgizip otyrady. Búginde dáriger kómegine júginbegen adamdy «qabyldaýda boldy» dep jazý máselesi jurtshylyq arasynda ózekti máselege ainalǵany belgili. Biylǵy qańtar-aqpan ailarynda filial mamandary azamattardan túsken aryz-shaǵymdar nátijesinde osyndai 57 faktini anyqtap, emhana-ambýlatoriia deńgeiinde júrgizilgen monitoring barysynda meditsina uiymdaryna 1,4 mln teńge aiyppul saldy. Qaitaryp alynǵan qarajat meditsinalyq kómektiń ózge túrlerine jumsalady»,- dedi MSQ Almaty filialynyń Meditsinalyq qyzmet sapasyn baqylaý bólimi basshysy Ásem Manapbaeva.
Almatyda 182 meditsina uiymy memlekettik tapsyrys sheńberinde halyqqa tegin kómek kórsetip jatyr. Olarmen bekitilgen kelisimsharttyń jalpy somasy 180,8 mlrd teńgeden asady.
