Almatydaǵy balmuzdaq tsehynda tógilgen ammiaktan bes adam ýlanyp, aýrýhanaǵa tústi, - dep habarlaidy Tengrinews.kz agenttigi KTK telearnasyna silteme jasap.
Telearna málimetinshe, Almatydaǵy "Shin-Lain" kompaniiasynyń tsehynda muzdatý qurylǵysynan aqaý shyǵyp, 500 gramm ammiak aǵyp ketken.
Aýaǵa taraǵan himiialyq qosyndynyń býyna ýlanǵan bes qyzmetker Almaty qalalyq jedel shuǵyl kómek kórsetý aýrýhanasyna jetkizilgen. Qazir úsheýi aýyr halde jansaqtaý bóliminde jatyr.
"Bes naýqastyń bireýiniń jaǵdaiy turaqty bolýyna bailanysty statsionarlyq emnen bas tartty. Tórt naýqastyń úsheýi qazir jansaqtaý bóliminde jatyr. Jaǵdaiy aýyr. Qalǵan bir naýqas toksikologiia bóliminde em alyp jatyr. Jaǵdaiy ortasha. Naýqastarda qusý, júrek ainý belgileri bolady", - dedi Almaty qalasy jedel shuǵyl kómek kórsetý aýrýhanasy qabyldaý bóliminiń meńgerýshisi Baýyrjan Omarov.
Aita keteiik, bul mekemede qyzmetkerler úsh aýysymda jumys isteidi. Zaýyt táýligine 60 tonnaǵa jýyq balmuzdaq shyǵarady. Tótenshe jaǵdaidan keiin kompaniia ishki tergeýdi bastady. Politsiia oqiǵanyń mán-jaiyn anyqtap jatyr.
"Júrgizgen tekseris qorytyndysy boiynsha, aqaý frizerdiń rezeńke jabyndysynan shyqqan. Iis shyǵa bastaǵanda qyzmetkerler birden syrtqa júgirgen. Oqiǵa tańǵy tórt shamasynda boldy. Alty adamnyń jaǵdaiy ýshyqqannan keiin, jedel járdem qyzmetin shaqyrdyq. Ekeýi aýrýhanaǵa jatýdan bas tartty. Óndiriste ammiak negizinen, muzdatqysh retinde paidalanylady", - dedi kompaniia direktory.
