Qaiyrymdylyq qory Almatynyń qalalyq balalar klinikalyq juqpaly aýrýlar aýrýhanasyna 5 jańa reanimatsiia kereýetin tabys etti, dep habarlaidy "Ult aqparat".
Quny 14 mln teńge turatyn kereýetti qor prezidenti Aidan Súleimenova satyp alǵan.
Pandemiia kezeńinde Almatynyń balalar juqpaly aýrýlar aýrýhanasy qaita jabdyqtalyp, elimizdiń iri megapolisinde jańa koronavirýs infektsiiasymen kúresetin basty ortalyqqa ainaldy. Munda virýs juqtyrǵan balalar ǵana emes, eresekter de emdelip jatyr.
Tótenshe jaǵdai kezinde balalar juqpaly aýrýlar aýrýhanasyna eresekterge arnalǵan reanimatsiia kereýetteri asa qajet. Sondyqtan aýrýhana basshylyǵy «AIaLA» qorynan kómek suraǵan bolatyn.
Demeýshi tappaǵan soń qor prezidenti qajetti reanimatsiia kereýetteriniń jartysyn óz qarajatyna satyp alý jóninde sheshim qabyldady.
Jańa tórt sektsiialyq mamandandyrylǵan reanimatsiia kereýetteri Túrkiiada jasalǵan. Olar júrek jáne ókpe jetkiliksizdigimen aýyratyn naýqasty barynsha yńǵaily qalypqa avtomatty rejimde tez jáne qaýipsiz aýystyrýǵa múmkindik beredi. Ókpeniń jetkiliksizdigi kezinde shalqalap otyrý ókpege júktemeni azaitady jáne jeńil tynys alýǵa múmkindik beredi.
Basqarý pýltteri arqa jáne jambas sektsiialaryn jeke-jeke jáne bir mezgilde arqa men jambas sektsiialarynyń biiktigin avtomatty rejimde birge ózgerte otyryp retke keltirýge múmkindik beredi. Al kereýettiń akkýmýliatory eger tipti aýrýhanada qandai da bir sebeppen elektr bolmai qalsa da emdelýshilerge tótenshe kómek kórsetiletinine kepildik beredi.
Almaty Qalalyq balalar klinikalyq juqpaly aýrýlar aýrýhanasynyń basshylyǵy jan saqtaý bólimine eń ozyq jabdyq jetkizip únemi qoldaý kórsetkeni úshin «AIaLA» qoryna alǵys bildirdi.
Osy qor jaqynda Almatynyń eresekterge arnalǵan qalalyq juqpaly aýrýlar aýrýhanasynyń jansaqtaý bólimine jalpy quny 30 mln teńge bolatyn 10 jańa reanimatsiia kereýetin tabystaǵan bolatyn.
