Almatydaǵy qaiǵyly oqiǵaǵa bailanysty Jeke sot oryndaýshylarynyń respýblikalyq palatasy qaza tapqan jeke sot oryndaýshylarynyń otbasylary men jaqyndaryna kóńil aitty, dep habarlaidy QazAqparat palatanyń saityna silteme jasap.
«Jeke sot oryndaýshylarynyń respýblikalyq palatasy Almatyda 20 qyrkúiekte qyzmettik mindetin atqarý barysynda qaza tapqan jeke sot oryndaýshylarynyń otbasylary men jaqyndaryna qaiǵyra otyryp kóńil aitady. Marqumdardyń artynda otbasy jáne kámelet jasyna tolmaǵan balalary qaldy», delingen habarlamada.
Palatanyń málimdeýinshe, atalǵan úiden shyǵarý jónindegi oryndaý óndirisi eki jeke tulǵanyń arasyndaǵy kelispeýshilikke qatysty bolǵan.
«Múlik menshigi quqyǵy tirkelgen adam baspanany elektrondy saýda-sattyqta satyp alǵan, ol burynǵy turǵyndardy kóshirip jiberý jóninde sotqa júgingen. 2020 jyly 10 maýsymda sot atalmysh ótinishti qanaǵattandyrdy. Boryshkerge byltyrdan beri birneshe ret sot sheshimin oryndaý qajettiligi jóninde eskertilgen», delingen habarlamada.
Jeke sot oryndaýshylarynyń kásibi qaýymdastyǵy áriptesterine qajetti kómek kórsetiledi dep málimdedi.
«Baspanadan shyǵarý jónindegi sot sheshimin oryndaý kezinde qaiǵyly oqiǵa boldy, bes adam óltirildi. Jeke sot oryndaýshylarynyń kásibi qaýymdastyǵy tarapynan qaza tapqandardyń otbasylaryna qajetti kómek jáne tolyqqandy qoldaý kórsetiledi.
Oqiǵanyń mán-jaiyn quqyqqorǵaý organdary tergeý jatyr», delingen habarlamada.
Aita keterligi, buǵan deiin Almaty ákimi Baqytjan Saǵyntaev qaza tapqandardyń jaqyndaryna barlyq tiisti kómek pen qoldaý kórsetiledi dep málimdegen edi.
Eske sala ketsek, Almatyda eki adamnyń menshik quqyǵyna qatysty daýy boiynsha sot sheshimin oryndaý kezinde burynǵy úi iesi qyzmettik mindetin oryndaýmen kelgen 5 adamdy atyp óltirdi.
Qazir osy qylmys boiynsha sotqa deiingi tergeý amaldary bastaldy.
