Ishki ister ministri Erlan Turǵymbaev Almatydaǵy "Buqar Jyraý Taýers" TK-de arnaiy operatsiia kezinde politsiia nege qarý qoldanbaǵanyn túsindirdi, - dep habarlaidy Tengrinews.kz.
Ishki ister ministri redaktsiia jýrnalisimen suhbat barysynda arnaiy operatsiia bes saǵatqa sozylǵanyn, osy ýaqytta mergender kez kelgen jaǵdaiǵa daiyn bolǵanyn aitty.
"Qarýdy birden qoldanýǵa bolar edi, biraq ol páterine tyǵylyp qaldy. Maqsatymyz kózin joiý emes, qylmystyq isti túsiný boldy. Ózi berilýi úshin birneshe ret kelissóz júrgizildi, biraq ol basqa joldy tańdap, ózin-ózi óltirdi.
Politsiia áskeri qarýdy múldem qoldanbady. Esikti arnaiy jarylǵysh qurylǵymen jarýǵa bolar edi, biraq páterler tyǵyz ornalasqan, ǵimarat syrty áinekpen qaptalǵan. Úidiń syrty jarylys tolqynynan qulaýy múmkin, al bul kóshedegi barlyq adamǵa qaýip tóndiredi. Sondyqtan táýekelge barmai, osyndai tásildi tańdadyq", - dedi Erlan Turǵymbaev.
Eske salaiyq, 24 sáýirde tústen keiin Almatydaǵy "Buqar Jyraý Taýers" turǵyn úi kesheninde turǵyndardyń biri men kúzetshi arasynda janjal shyǵyp, saldarynan kúzetshi myltyqtan jaraqat aldy. Ol aýrýhanaǵa jetkizildi.
Keiinirek atys shyǵarǵan er adam 17-qabattaǵy páterine tyǵylyp qaldy. Oqiǵa ornyna politsiia kelip, aýmaqty qorshady. Turǵyn úi kesheninen ara-tura atylǵan oqtyń dybystary estildi. Quqyq qorǵaý organdarynyń málimetinshe, qarýly adam sóilesýden bas tartyp, baspaldaq jaqqa 10-nan asa oq atqan.
Sońynda er adam terezeden sekirip óldi.
