Foto: Polisia.kz
Almatydaǵy arnaiy is-shara barysynda internet-alaiaqtar toby ustaldy, - dep habarlaidy "Ult aqparat" Polisia.kz saityna silteme jasap.
Top quramynda 27 jáne 25 jastaǵy eki áiel bar. Qylmystyń basqa da sybailastary – 28 jáne 33 jastaǵy er adamdar.
"Bul kúnderi Almatyda aqparattyq tehnologiialardy qoldaný arqyly jasalǵan quqyqbuzýshylyqpen kúresý sharalarynyń tiimdiligin arttyrýǵa baǵyttalǵan alaiaqtyqqa qarsy respýblikalyq Anti Fraud is-sharasy ótip jatyr. Osy is-shara aiasynda tórt adamnan turatyn top áshkerelendi. Bostandyq aýdandyq PB-na qarasty politsiia bólimine kómek surap júgingen almatylyq turǵynnyń aryzyna sáikes, kúdiktiler aldaý jáne senimge qiianat jasaý arqyly 1,1 million teńge kóleminde qarajatty iemdenip ketken. Tolyǵyraq aitatyn bolsaq, er adamnyń uialy telefonyna profilinde ápkesiniń sýreti bar abonentten habarlama kelgen. Habarlamany jiberýshi onyń bank shotyna aqsha jiberýdi ótingen. Er adam ápkesine kómekteskenine senimdi bolǵan", - dedi, Almaty qalalyq PD kriminaldyq politsiia basqarmasynyń bastyǵy Qýatbek Naýatov.
Alaiaqtar anyqtaldy jáne ustaldy. Olar – Túrkistan oblysynan kelgender. Ustalǵandardyń úsheýi buryn da alaiaqtyq jasaǵany úshin qylmystyq jaýapkershilikke tartylǵandyǵy belgili boldy.
"Qylmysty ashýǵa ekinshi deńgeili bankterdiń biriniń qaýipsizdik qyzmetkerleri kómek kórsetken. Qazirgi ýaqytta qylmystyq is boiynsha osy qylmystyq istiń jan-jaqty, tolyq jáne obektiv tergelýin qamtamasyz etý úshin qajetti tergeý sharalary júrgizilip jatyr. Sotaldy tergeýdiń osy kezeńinde bul top jasaǵan úsh birdei alaiaqtyq deregi anyqtaldy", – dedi Almaty qalalyq PD kriminaldyq politsiia basqarmasynyń bastyǵy Qýatbek Naýatov.
